Një ekip i Organizatës Botërore të Shëndetësisë (OBSH) ka dalë nga karantina dhe do të fillojë hetimet në Kinë për origjinën e koronavirusit në qytetin kinez të Wuhan.
Shkencëtarët do të fillojnë të intervistojnë njerëz nga institutet kërkimore, spitalet dhe tregu i prodhimeve të detit të lidhura me shpërthimin fillestar të virusit. Hulumtimi i tyre do të mbështetet në provat e siguruara nga zyrtarët kinezë. Kjo vjen pas muajsh negociatash midis OBSH-së dhe Pekinit.
Disa të afërm të viktimave Covid-19 në Kinë shpresojnë të takohen me hetuesit. Zhang Hai, një vendas në Wuhan, babai i të cilit vdiq në shkurt, i tha BBC se ai shpreson që të flasë me OBSH mund të “ndihmojë hetimin e tyre”.
Grupi prej 13 ekspertësh arriti në Wuhan në 14 Janar dhe kaloi dy javë në karantinë që e përfunduan ditën e sotme. OBSH-ja kishte thënë se hetuesve të tyre u ishte mohuar hyrja në Kinë pasi një anëtar i ekipit u kthye mbrapa dhe një tjetër u bllokua në tranzit. Pekini më vonë tha se ishte një keqkuptim.
Covid-19 u zbulua për herë të parë në Wuhan në fund të vitit 2019, por Kina ka thënë për muaj që nuk është vendi nga ka lindur virusi. Media shtetërore kohët e fundit ka sugjeruar se pandemia mund të ketë filluar jashtë Kinës – Spanja, Italia apo edhe SH.B.A. – dhe gjithashtu kanë kryer pretendime se virusi ka hyrë në vend përmes importeve të ushqimit të ngrirë, megjithëse ekspertët kanë hedhur dyshime për këtë.
