COVID-19/ BE bie dakord, do të hapen kufijtë për udhëtarët e vaksinuar

Vendet anëtare të Bashkimit Evropian kanë rënë dakord që të hapin kufijtë për udhëtarët e vaksinuar plotësisht nga COVID-19.

Mediat e huaja shkruajnë se me këto të dhëna, udhëtarët nga vende të tilla si Britania dhe Shtetet e Bashkuara do të mund të udhëtojnë në shtetet anëtare të BE pa pasur nevojë të karantinohen. Gjithashtu udhëtarëve nga vendet si Australia, Zelanda e Re, Koreja e Jugut dhe Izraeli do t’u lejohet të hyjnë në bllok edhe nëse nuk janë të vaksinuar, por do t’u duhet të tregojnë një test negativ. Ambasadorët e BE kanë rënë dakord për të lejuar personat e vaksinuar të Britanisë dhe vizitorët nga vendet e tjera të treta të hyjnë në bllok.

Lajmin e ka konfirmuar edhe AFP e cila njofton se sipas burimeve të brendshme ka pasur një takim mes diplomatëve në Bruksel. Mësohet se nga takimi i diplomatëve ditën e sotme në Bruksel, gjithashtu arritën një marrëveshje për të rritur kufirin e rasteve të një vendi përpara se ai të shpallej “i pasigurt”. Kjo është një masë që do të lejojë qytetarët nga më shumë vende të udhëtojnë në BE. Duket se BE me nisjen e sezonit turistik do të hapë dhe kufijtë për personat që janë vaksinuar plotësisht me dy doza. Vendim zyrtar pritet të merret të premten.