Rreth 2620 viktima dhe mbi 77 mijë të prekur- ky është bilanci i deritanishëm nga Coronavirusi që ka paralizuar botën.
Po ashtu, numri i të infektuarve në Itali vijon të rritet duke shkuar në mbi 230, ndërsa janë shënuar 7 viktima.
Situata paraqitet shqetësuese gjithashtu edhe në Korenë e Jugut, ku janë shënuar 231 raste brenda 24 orësh, ndërsa numri total i të infektuarve është rreth 1 mijë.
Në këto kushte Organizata Botërore e Shëndetësisë ka dhënë alarmin duke theksuar se bota duhet të përgatitet për një pandemi.
Drejtori i Përgjithshëm Tedros Adhanom Ghebreyesus theksoi se OBSH është duke i ndjekur me vëmendje zhvillimet mbi virusin kinez dhe e cilësoi shqetësuese shkallën e përhapjes.
Ndryshimi mes pandemisë dhe epidemisë është se kjo e fundit është një sëmundje ngjitëse ose virale që prek shumë individë në një zonë të caktuar, ndërsa një pandemie është një sëmundje ngjitëse ose virale që përhapet jashtë vendit në të cilin ka ndodhur shpërthimi.
Sipas Organizatës Botërore të Shëndetësisë, një pandemi mund të infektojë miliona njerëz në pjesë të ndryshme të botës.
