Pas sherrit me deputetin Dashnor Sula, Kreshnik Çollaku ka sqaruar sherrin e ndodhur në zyrat e Kuvendit me kolegun e tij.
Në një deklaratë për mediat Çollaku tha se ajo që ndodhi ishte një incident i turpshëm dhe se nuk e kishte menduar se mund të ndodhte një gjë e tillë. Ai thekson se e mbështet kërkesen e Rithemelimit për komisionet parlamentare, aty ku pjesë bën dhe deputeti Sula.
Deklarata e Kreshnik Çollakut:
Sqaroj opinionin publik lidhur me incidentin e turpshëm që ndodhi sot. Kam 30 vjet i angazhuar në politikë. Nuk flas për veten, por mbase sot është dita. Ja një prej studentëve të dhjetorit ’90. Jam themelues i PD-së dhe një prej drejtuesve të forumeve rinore që mes armëve organizonim rezistencë në kushte kur jeta nuk ishte e sigurtë.
Kam dashur një PD evropiane dhe të reformuar. Nuk kam pasur pengesë për të thënë idetë e mia. Nuk e kisha imagjinuar kurrë se do gjendesha në një situatë të tillë. Unë jam anëtar i komisionit për Çështjet Evropiane. Kam marrë pjesë si i ftuar nga kryetarja Tabaku.
U gjenda në sallë me një situatë surprizë, mbledhja drejtohej nga nënkryetarja dhe të pranishëm ishin ish-kolegë që s’janë anëtarë të komisionit, por nuk u shqetësova. Për shkak të rrëmujës, edhe pse unë e mbështes kërkesën e tyre për komisionet parlamentare, nuk arrita dot të dëgjoja ministren për integrimin dhe t’i thoja se qeveria e Ramës është përgjegjëse për vonesën e plotësimit të hapave për integrimin.
