Pas mbylljes së seancës në Gjykatën e Posaçme të Apelit, ish-ministri i Brendshëm Saimir Tahiri jashtë dyerve të gjykatës ka folur për mediat, ku nuk i ka kursyer deklaratat hipotetike.
Ai ka deklaruar se ka do të presë vendimin e gjykatës për të dhënë një mendim për të, duke shtuar se ka qenë i ndershëm me këdo që ka pasur pranë.
Tahiri tha se nuk ka ikur kurrë nga politika dhe shtoi se tashmë gjyqi është bërë shumë qesharak.
Duke ‘sfiduar pasardhësit’ e tij, Tahiri u shpreh se punën e tij e ka bërë më mirë se ata që kanë qenë para tij dhe pas tij, duke thumbur dhe Fatmir Xhafën dhe Sandër Lleshajn, teksa në fund ai u shpreh se “çmimi i jetës sime nuk kalon nga çmimi i karrierës së tyre”, referuar prokurorëve.
Çfarë ndodhi sot në gjykatë?
E keni dëgjuar dhe stërdëgjuar dhe nuk bësoj ja vlen të zgjatem, ne folëm dhe kjo ishte e fundit. Tani duhet të flasë gjykata.
Ka ndonjë ndryshim nga ajo që keni thënë në gjykatën e shkallës së parë?
Kursejeni dhe për publikun këtë dhe se është bërë qesharake dhe gjyqi im, qytetarët kanë shumë gjëra të tjera për t’u marrë ka më shumë halle.
Besoni tek pafajësia?
Unë nuk kam folur shumë gjatë gjatë kohës që kanë qenë i akuzuar, e kam bërë këtë për të reskpektuar drejtësinë. Unë kam dorëzuar dhe mandatin, por nuk e kam bërë këtë, pasi mund të vija këtu si deputet dhe të shkoja dhe në Kuvend. Unë besoj tek drejtësia, para qytetarëve e familjes stime jam i bindur se kam bërë gjënë e duhur. E kam bërë detyrën më mirë se ata që ishin dhe ata që janë në detyrë.
A do rikthehesh në politikë nëse merrni pafajësinë?
Unë s’kam iku, nuk më tundon kjo historia e politikës, nuk më ka tunduar dhe kur kam qenë deputetë.
Do ta pranoni vendimin e gjykatës?
Do ta pranoj pa asnjë diskutim, do e pranoj siç çdo vendim gjykate.
Keni hedhur akuza për prokurorët se kanë manipuluar provat?
Çmimi i jetës sime nuk kalon nga çmimi i karrierës së tyre.
Ish-ministri i Brendshëm Saimir Tahiri u vu nën akuzë pas arrestimit të grupit “Habilaj” ndërsa që në fillim ai pretendoi pafajësi duke e quajtur një proces farsë me prova të montuara.
Në shtator të vitit të kaluar ish-Prokuroria e Krimeve kërkoi dënimin e tij me 12 vite, ndërsa për shkak të gjykimit të shkurtuar shkonte 8 vite, por gjykata e dënoi Tahirin me 3 vite burg me shërbim prove.
Të dyja palët nuk u kënaqën duke e apeluar vendimin, prokuroria që nuk tërhiqet nga kërkesa për dënimin e tij me 12 vite, ndërsa ish-ministri kërkon pafajësi të plotë.
Tahiri akuzohet për 3 vepra penale “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”.
Prokuroria e akuzon Tahirin se në kohën kur ishte ministër i Brendshëm bashkë me ish- drejtorin e Policisë Vlorë, Jaeld Çela kanë bashkëpunuar me Moisi Habilajn.
