Avokati Alban Duraj, i ftuar në emisionin “Koha për t’u zgjuar” në News24, kritikoi ashpër çmimet dhe cilësinë e shërbimeve të operatorëve celularë në Shqipëri.
Ai theksoi se tarifat që aplikohen nga Vodafone dhe One Albania janë ndër më të lartat në rajon, ndërsa cilësia e sinjalit dhe e internetit nuk justifikon çmimet e larta.
“Çmimet e kompanive në vendin tonë janë më të lartat në rajon. Matjet janë bërë në raport me ofertat që ato ofrojnë për konsumatorët. Ndërkohë, sinjali dhe cilësia e internetit nuk janë në nivelin e duhur,” – u shpreh Duraj.
Duraj shpjegoi se ndërsa interneti është një mjet i domosdoshëm për shumë qytetarë, si për ata që janë në marrëdhënie pune ashtu edhe për ata që e përdorin për argëtim, shërbimi mbetet problematik.
Vodafone dhe One Albania dominonin tregun e telekomunikacionit në Shqipëri, duke ofruar shërbime të dobëta pavarësisht çmimeve të larta.
Këto kompani janë krijuar si një oligopol perfekt, duke përdorur oferta që fshehin rritjen e çmimeve dhe duke mashtruar qytetarët me shërbime të cilësisë së ulët. Ato nuk kanë interes për përmirësimin e shërbimeve në Shqipëri dhe janë përqendruar në investimet e mëdha jashtë vendit, duke përdorur paratë që fitojnë nga qytetarët shqiptarë.
Pavarësisht ligjit që ndalon ndryshimin e çmimeve në kontratat me afat të caktuar, Vodafone dhe ONE Albania kanë ndryshuar tarifat pa asnjë transparencë, duke shkaktuar shumë ankesa nga qytetarët.
Për më tepër, këto kompani janë akuzuar për mashtrime me ofertat e internetit fiks, duke shitur paketa që nuk arrijnë të instalohen kurrë, dhe ofrojnë një shërbim të dobët ndaj klientëve, të cilët përballen me heshtje dhe mungesë përgjigje kur ankohen.
Së fundmi, Autoriteti i Konkurrencës ka hapur një hetim ndaj këtyre dy kompanive për abuzime me çmimet, por hetimet kanë pasur pak mundësi për të sjellë rezultate, pasi shumë raste përfundojnë në heshtje në sirtarët e institucioneve.
