“Ç’grerëz e ka pickuar”/ Çfarë deklaronte Kadareja 20 vite më parë për austriakun e Nobelit

Google+ Pinterest LinkedIn Tumblr +

Juria e Nobelit për Letërsi ka lënë të gjithë me gojë hapur, kur ia dorëzoi çmimin, shkrimtarit austriak, Peter Handke.

Ky i fundit është një personazh i urryer për botën shqiptare, për shkak se ka mohuar gjenocidin serb në Kosovë dhe Bosnje.

Gjithashtu ai është deklaruar hapur si një përkrahës i Millosheviç.

Një nga shkrimtarët më të mëdhenj shqiptarë Ismail Kadare, e ka takuar disa vite më parë.

Gazeta letrate “Exilibris”, ka sjellë në vëmendje përshtypjet e Kadaresë për austriakun.

Kadare tregon se Handke ishte ai që propozoi librat e tij për përkthim.

Më tej ai thotë, se nuk e gjen dot se ç’grerëz e ka pickuar, duke qenë se ka mbrojtur me zell krimet e Serbisë në Kosovë dhe Bosnje.

Shkrimtari shqiptar ka zbuluar edhe frazën e Handkes, nga e cila mund të burojë e keqja sipas tij.

Ismail Kadare, 20 prill 1999

Televizioni austriak më kërkon një mendim për qendrimin e Peter Handkes. Në Austri dhe në Gjermani ka fushatë të ashpër kundër tij. Ai qendrim, ç’është e vërteta, më shumë se zemërim, më ka shkaktuar brengë. Siç ndodh me njerëzit që i njeh. Siç ndodh me sjelljet që ndryjnë brenda një mister.

Shkrimtari më i njohur i Austrisë. Me nënë sllovene. Frankofon. Prej vitesh, duke qenë këshilltar pranë shtëpisë botuese austriake “Residennz Verlag”, është ai që ka propozuar librat e mi për përkthim.

E kam njohur para ca vitesh në Paris. Ambasadoja e Austrisë në Francë na ftoi për darkë të dyve, bashkë me gratë. Gruaja e tij franceze është e admirueshme.

Nuk e gjej dot ç’grerëz e ka pickuar. Gjithë ai tërbim kundër shkrimtarëve boshnjakë, gjithë ai zell për të mbrojtur krimet serbe në Bosnjë e pastaj në Kosovë.

Një shkrimtar kroat përpiqet ta shpjegojë me zanafillë frojdiste. Nuk më besohet.

Ndërkaq, nga darka në ambasadën austriake më kujtohet një frazë e tij. Një frazë disi e veçantë, e thënë me njëfarë pikëllimi: “nuk jam më i njohur si më parë”.

A mund të jetë atje ana e së keqes? Ndoshta, pse jo.

Shpërndaje
Share.

Komento