Kategoria Superiore e futbollit në vend duhej të startonte sezonin e ri futbollistik 2020-2021 më 12 shtator të këtij viti.
Liga Profesioniste në bashkëpunim me presidentët e klubeve të Superiores si dhe FSHF-në, morën vendimin të bojkotojnë kampionatin për shkak të krizës së thellë financiare, teksa kërkojnë ndihmë nga qeveria për plotësimin e 4 kërkesave bazë që ata kanë.
Kërkesat e Ligës Profesioniste të Futbollit
-Miratimin e një ligji të ri për sponsorizimet sipas formës së propozuar nga komuniteti i futbollit, pasi ndryshimet e propozuara nga qeveria nuk kanë asnjë efekt real mbi ekonominë e futbollit.
-Përfshirjen e të gjitha aktiviteteve ekonomike të futbollit në TVSH-në e reduktuar në masën 6%, si bujqësia dhe turizmi dhe jo vetëm infrastrukturën sportive.
-Zerimin e gjobave dhe kamatë-vonesave për detyrimet fiskale të prapambetura për të shmangur kolapsin financiar të klubeve.
-Zgjatjen e efekteve të përjashtimit nga tatimi mbi të ardhurat për sportistët nga 2 në 10 vite
Për këtë qeveria ka menduar se duhet ndërhyrja e Ministrisë së Financave dhe deputeteit Fidel Ylli për të gjetur një zgjidhje sa më të mirë e të shpejtë por ende jo. Pasi edhe në takimin e dytë që u zhvillua mes përfaqësuesve të qeverisë dhe atyre të Ligës Profesioniste nuk u arrit një dakordësi për kërkesat e tyre dhe specifikisht Ligjin e Sponsorizimit.
Ndërkohë në lidhje me këtë situatë aspak të mirë për futbollin në vendin tonë ka reaguar edhe FIFA dhe dhe UEFA të cilat nxisin qeverinë shqiptare dhe FSHF-në që të gjejnë zgjidhje të arsyeshme dhe të përshtatur për kërkesat e klubeve shqiptare të futbollit në mënyrë që sezoni të fillojë sa më parë.
Siç e dini, FIFA dhe UEFA në përgjithësi inkurajojnë krijimin e një kuadri rregullator kombëtar gjithëpërfshirëse, që mbështet zhvillimin e futbollit në të gjitha nivelet.
Rëndësia e ruajtjes së një marrëdhënieje të ngushtë dhe konstruktive të punës midis organeve të futbollit dhe autoriteteve qeveritare (në përputhje me të drejtat dhe përgjegjësitë e tyre përkatëse) nuk ka nevojë të mbivlerësohet.FIFA dhe UEFA nxisin qeverinë shqiptare dhe FSHF-në të gjejnë zgjidhje të arsyeshme dhe të përshtatur për kërkesat e klubeve shqiptare të futbollit në mënyrë që sezoni të fillojë pa shtyrje të mëtejshme.
Në një sondazh të kryer nga “Gazeta Reforma” 38% e votuesve shprehen se bojkoti i klubeve për startimin e sezonit të ri futbollistik është me vend pasi e kuptojnë gjendjen dhe kushtet e klubeve të Kategorisë Superiore. Por njësoj si FIFA dhe UEFA mendojnë dhe 52% e vootuesve të cilët shprehen se fajin për këtë bojkot e ka qeveria dhe 24% mendojnë që faj ka edhe FSHF-ja.
Liga Profesioniste dhe Qeveria ende nuk ka arritur një konsensus, por ata që ndëshkohen nga ky bojkot janë tifozët e klubeve të Superiores të cilët mbeten pa parë futboll, por edhe vetë futbollistët të cilët rrezikojnë pagën pasi ende nuk kanë zbritur në fushë.
