Ditën e sotme, ish-deputeti i Partisë Socialiste ka dalë sërish para togave të zeza, në një seancë ku avokatët mbrojtës të të pandehurve për dosjen e inceneratorit të Fierit do të paraqisnin konkluzionet në mbrojtje të klientëve të tyre. Por ndryshe nga herët e tjera, Alqi Bllako ka hedhur akuza të forta ndaj Prokurorisë të Posaçme kundër Korrupsionit dhe Krimit të Organizuar, organ i cili seancën e kaluar vendosi të kërkonte ndryshimin e akuzës duke rikthyer akuzën fillestare për “shpërdorim detyre” si funksionar i lartë shtetëror dhe jo si funksionar publik.
Bllako u shpreh se rikthimi tek akuzat fillestare nga ana e prokurorit Dritan Prençi, duke anashkaluar vendimin e gjyqtares paraprake, tregon se është orkestruar goditja e tij në kuadër të një axhende të caktuar. Alqi Bllako pretendon se nuk ka qenë zyrtar i lartë publik, por funksionar i lartë civil, ndërkohë që paralajmëroi se shkeljet e konstatuara do ti ankimojë në KLP dhe deri në Strasburg.
“Shkelja e ligjit është aq flagrante sa nuk di nëse ka të bëjë me injorancën profesionale apo një hakmarrje personale. Vetëm SPAK mund të akuzojë për një detyrë që nuk ka qenë detyra ime. Standart i hapur esktraligjor, duke çuar përpara një axhendë hakmarrjeje personale ndaj personit tim”, është shprehur thënë Bllako në seancë.
