Presidenti Ilir Meta, pas fjalës së tij në Konferencën e mbajtur për 100 vjetorin e Luftës së Vlorës, ka dhënë edhe një prononcim për gazetarët në lidhje me zhvillimet e fundit politike në vend.
Meta ndër të tjera iu përgjigj pyetjeve të gazetarëve në lidhje me datën e zgjedhjeve parlamentare të 2021, kërkesën e Greqisë për zgjerimin me 12 milje në detin Jon, si dhe për letrën e ambasadores amerikane Yuri Kim drejtuar liderëve politik, në lidhje me vettingun në përzgjedhjen e kandidatëve për deputetë.
Kreu i shtetit u shpreh para gazetarëve se ende nuk ka një datë për zgjedhjet, ndërsa lidhur me apelin që ambasadorja amerikane Yuri Kim u bëri të gjithë krerëve të partive politike që të mbajnë jashtë listave kandidatët e inkriminuar, presidenti u shpreh se vetëm zgjedhjet e lira dhe të ndershme do të mund të zgjidhnin problemin e kandidatëve ‘problematikë’.
Po ashtu presidenti foli edhe për çështjen e ndjeshme të zgjerimit 12 milje të Greqisë në detin Jon.
Meta u bëri thirrje të gjitha palëve që të tregohen sa më të kujdesshëm me deklaratat e tyre.
Fjala e Metës përballë gazetarëve:
A ka një datë për zgjedhjet?
Nuk mund të themi asgjë. Do të dëgjoj përfaqësuesit e forcave politike dhe do flasim pastaj më me siguri. Kam kërkuar takim me përfaqësuesit, përfshirë edhe kreun e Komisionit të Integrimit Europian.
Mesazhi i Kim për krerët e partive politike?
Mendoj që ka ardhur koha që përmes zgjedhjeve të lira dhe të ndershme të pastrohet gjithçka në vendin tonë. Vetëm zgjedhjet e lira e të ndershme e pastrojnë politikën nga elementë kriminale dhe të korruptuar që për interesa grupesh të ndryshme kërkojnë të mbajnë peng funksionin e shtetit ligjor.
Çështja e detit me Greqinë?
Sjella ime ka qënë dhe do të jetë shtetërore dhe kushetuese e përgjegjshme. I ftoj të gjithë të jenë të kujdesshëm që të mos bëjnë deklarata në dëm të Shqipërisë.
Kujtojmë se mbrëmjen e sotme kryeministri Rama, presidenti Ilir Meta dhe kreu i PD-së, Lulzim Basha do të bëhen bashkë në ceremoninë e organizuar për 100 vjetorin e Luftës së Vlorës.
