Të hënën, më 7 prill, do të mbahet ceremonia mortore për Ilaria Sulën, 22-vjeçaren shqiptare të vrarë në Romë, Terni, aty ku është rritur dhe ku jetojnë prindërit e saj. Rreth orës 14:00, kortezhi do të niset nga banesa në Viale dello Stadio drejt varrezave komunale, ku do të zhvillohet një ceremoni e thjeshtë në hyrje të varrezave.
Babai i Ilarias ka falënderuar qytetin e Ternit, kryetarin e bashkisë, policinë dhe të gjithë qytetarët për solidaritetin e treguar ndaj familjes, si dhe për pjesëmarrjen e paralajmëruar në ceremoninë e lamtumirës.
Policia sekuestron kompjuterin e vrasësit, prindërit e tij në fokus të hetimeve
Ndërkohë, hetimet për vrasjen e 22-vjeçares po thellohen. Policia italiane ka sekuestruar të dielën kompjuterin e Mark Samson, 23-vjeçarit filipinez që ka pranuar vrasjen e Ilaria Sulës në banesën e tij në Romë. Hetuesit dyshojnë se i riu nuk ka vepruar i vetëm, veçanërisht në pastrimin e shtëpisë dhe makinës, si dhe në transportimin dhe fshehjen e trupit, i cili u gjet 40 kilometra larg Romës, në një zonë të pyllëzuar.
Autoritetet kanë ndaluar gjithashtu prindërit e Samsonit që të largohen nga Italia. Dyshimet për përfshirjen e tyre në fshehjen e krimit janë shtuar pas dëshmive kontradiktore. Ndërsa i ati ka deklaruar se nuk ka qenë në banesë në momentin e krimit, nëna ka thënë se të gjithë ndodheshin në shtëpi.
Nëna e Samson do të merret në pyetje nga hetuesit
Të hënën, po më 7 prill, nëna e Mark Samson do të merret në pyetje nga Seksioni i Vrasjeve i Skuadrës Fluturuese të Policisë së Romës, në kuadër të hetimeve për përfshirjen e saj të mundshme në fshehjen e trupit të viktimës.
Sipas raportimeve të “LaPresse”, pas krimit të kryer më 25 mars, gruaja ka hyrë në dhomën e djalit pasi dëgjoi britmat e Ilarias dhe ka parë trupin e pajetë të saj. Dyshohet se më pas ajo ka ndihmuar djalin në pastrimin e skenës së krimit në apartamentin në via Homs, në lagjen afrikane të Romës.
Rikonstruksioni i krimit dhe dyshimet e hetuesve
Sipas dëshmisë së dhënë nga Samson pas arrestimit, ai e ka goditur me thikë Ilarian në orën 11:00 të mëngjesit të 25 marsit, pas një debati të ndezur që nisi pasi kishte parë një mesazh në celularin e saj. Ai e ka qëlluar me dy plagë vdekjeprurëse në qafë, ndërsa ajo kishte kthyer shpinën. Sipas ekspertëve, vdekja ka ardhur për shkak të një hemorragjie të fortë dhe ka ndodhur brenda pak minutash.
Pas krimit, Samsoni e futi trupin në një valixhe, të cilën fillimisht e la pranë derës së banesës dhe më pas pastrimi nisi me produkte që kishte në shtëpi. Ai pretendon se ka hedhur thikën, një tapet dhe materialet pastruese në një kosh plehrash afër banesës. Më pas, valixhen e ngarkoi në makinë dhe u nis drejt zonës së Polit, rreth 40 kilometra larg, ku e hodhi trupin në një luginë.
Hetuesit dyshojnë në versionin e dhënë, sidomos për kohën dhe mënyrën e kryerjes së të gjitha veprimeve pa ndihmën e askujt. Në orët pas arrestimit, Samson ka pranuar se nëna e tij ka qenë e pranishme në banesë, por më vonë ka heshtur mbi rolin e saj.
Në hetim edhe marrëdhënia e çiftit dhe një tentativë e mëparshme
Në dokumentet e hetimit ndodhet edhe dëshmia e një shoqeje të Ilarias, e cila ka treguar se më 25 mars, në mungesë të saj, Samsoni kishte shkuar në banesën e vajzës dhe kishte tentuar të merrte kompjuterin e saj, duke bërë edhe disa ‘screenshot’. Kjo ka ngritur dyshime të mëtejshme për qëllime të mundshme për të kontrolluar apo zbuluar informacione nga jeta private e së resë.
Hetuesit do të analizojnë gjithashtu telefonat e prindërve të Samsonit për të zbuluar çdo informacion të mundshëm mbi përfshirjen e tyre dhe mbi dinamikën e plotë të ngjarjes që ka tronditur opinionin publik në Itali dhe Shqipëri.
