Komisioneri Shtetëror i Zgjedhjeve, Ilirjan Celibashi, zhvilloi të mërkurën një seancë publike për shpërndarjen e mandateve të deputetëve në Qarkun e Tiranës, ku u zyrtarizuan rezultatet për shumicën e subjekteve politike.
Në përfundim të procesit, Partia Socialiste siguroi 19 mandate, koalicioni PD-ASHM mori 13, Partia Mundësia 2 mandate, ndërsa “Lëvizja Bashkë” përfitoi 1 mandat.
Por ndryshe nga këto subjekte, shpërndarja e mandateve për Partinë Socialdemokrate dhe koalicionin “Nisma Shqipëria Bëhet” mbeti pezull. Komisioneri Celibashi kërkoi 30 minuta kohë shtesë për shqyrtimin e kërkesave të tyre, për shkak të kontestimeve dhe situatës së pazakontë.
Përfaqësuesja ligjore e koalicionit “Nisma Shqipëria Bëhet”, Dorina Prethi, kërkoi që Komisioneri të njohë dorëheqjet e 12 kandidatëve nga lista e mbyllur dhe që mandati t’i kalojë Adriatik Lapajt, si kandidati me më shumë vota preferenciale në këtë subjekt. Ajo ngriti edhe dyshime për vlefshmërinë e dokumenteve të kandidatit Zeqir Kordhoni, duke pretenduar se firma në dokumentet e tij të kandidimit mund të jetë e falsifikuar.
E njëjta kërkesë është bërë edhe nga Partia Socialdemokrate, e cila ka dorëzuar në bllok dorëheqjet e kandidatëve të listës së mbyllur, duke kërkuar që mandati të kalojë te kandidati më i votuar me votë preferenciale.
Komisioneri Celibashi u shpreh se do të shqyrtojë në detaje situatën dhe do të japë vendimin pas një analize shtesë të dokumentacionit.
