Gjatë verës, nuk janë të pakta rastet kur në rrugët interurbane shihen automjete të përfshira nga flakët, pa ndonjë lidhje me ngjarje kriminale. Sipas statistikave të Policisë së Shtetit, mesatarisht 5 automjete në javë digjen si pasojë e defekteve teknike, që mund të shkrumbojnë mjetin në pak sekonda dhe të rrezikojnë jetën e drejtuesit apo pasagjerëve.
Eksperti i mjeteve motorike, Fadil Lukaj, thekson se kjo është një shifër e lartë në raport me numrin e automjeteve që qarkullojnë në Shqipëri. Ai nënvizon disa gabime të zakonshme që kryejnë drejtuesit e mjeteve:
“Duhet shmangur nxehja e tambureve nga frenimi i vazhdueshëm. Kur bëhet ndërrimi i vajrave dhe lubrifikantëve, duhet të lahet motori. Gjatë verës, motorët me naftë marrin zjarr nga bllokimi i filtrit partikular. Një tjetër shkak është edhe riparimi i sistemeve elektrike në servise të pacertifikuara”, shprehet Lukaj.
Zjarret ndodhin më së shumti në orët e mëngjesit ose në momentin e ndezjes së makinës, çka sinjalizon mungesën e mirëmbajtjes periodike dhe përdorimin e pjesëve jo origjinale apo të instalimeve të pasigurta elektrike.
Për të shmangur ngjarje të tilla, rekomandohet kontroll teknik i rregullt dhe verifikimi nëse mjetit i janë hequr sisteme sigurie nga përdoruesit e mëparshëm apo janë bërë instalime të pasakta.
Një masë parandaluese praktike është edhe mbajtja e një fikse zjarri 6 kg brenda automjetit, në mënyrë që në rast emergjence të minimizohen dëmet.
