Një ngjarje e rënde është regjistruar në orët e parë të mëngjesit në Shkodër.
Nga të dhënat e para dy persona të maskuar me motoçikletë kanë qëlluar me armë dhe kanë kërcënuar një shtetas në rrugën Shkodër – Velipojë, konkretisht në afërsi të fshatit Darragjat.
Burime pranë policisë së Shkodrës thonë se ngjarja ka ndodhur rreth orës 06:00 të mëngjesit kur dy persona me motor të maskuar i kanë zënë pritë një mjeti tip Benz, ku po udhëtonte një 50 vjeçar banues në fshatin Darragjat.
Sipas dëshmisë së dhënë para policisë nga 50 vjeçari Alban Luka, autorët e kanë ulur në gjunje drejtuesin e mjetit duke e kërcënuar dhe pastaj kanë qëlluar me automatik në ajër.
“Më ulën në gjunjë dhe më kërcënuan, nuk kam pasur konflikte me asnjë njeri”, mësohet të jetë shprehur në Polici Luka, ndërkohë që siç shihet dhe nga pamjet mjeti i tij është bërë shosh nga plumbat e shumtë.
Fatmirësisht si pasojë e kësaj ngjarje nuk ka pasur viktima, ndërsa plumbat kanë dëmtuar makinën tip Benz të 50-vjeçarit. Policia po punon për identifikimin e autorëve të kesaj ngjarje të rënde e cila rikthen maskat në Shkodër.
