Rrjeti i organizatave Barazi në Vendimmarrje ka reaguar ashpër ndaj përdorimit të gjuhës së dhunës verbale me bazë gjinore në Kuvend, gjatë seancës së datës 5 dhjetor.
Në deklaratën e tyre, ato theksojnë se një sjellje e tillë dekurajon gratë të angazhohen në politikë dhe dëmton rëndë vlerat demokratike.
“Dënojmë me vendosmëri çdo formë dhune, qoftë ajo verbale, psikologjike apo fizike,” thuhet në reagim. “Kjo sjellje jo vetëm që minon progresin demokratik, por edhe pengon përparimin e shoqërisë sonë.”
Në kushtet e tensioneve të shtuara politike, Task Forca Kundër Dhunës ndaj Grave në Politikë u bën thirrje deputetëve dhe institucioneve më të larta që të vendosin komunikimin dhe dialogun në qendër të veprimtarisë politike, duke shmangur çdo formë dhune dhe gjuhë denigruese.
Përplasja në Kuvend
Reagimi i rrjetit erdhi pas fjalorit të përdorur nga deputeti Erion Braçe ndaj deputetes Ina Zhupa, me terma denigrues si: “mos hidh parfum,” “pri thonjtë,” “nuk di të lexosh, nuk di të shkruash,” dhe “dukesh si ruse.” Përballë këtij sulmi verbal, Zhupa reagoi me gjuhë të ashpër duke thënë: “O Erion, të rritë boja, sa shumë m… të ha goja.” Kjo përplasje nxiti një klimë tensioni, duke çuar në ndërprerjen e seancës plenare pas përplasjes së grupeve parlamentare.
Deklaratë:
Thirrje për Kujdes në Komunikim dhe Dialog
Në kushtet e tensioneve të shtuara politike, Task Forca Kundër Dhunës ndaj Grave në Politikë u bën thirrje deputetëve dhe institucioneve më të larta që të zgjedhin komunikimin dhe dialogun si mënyrën kryesore për zgjidhjen e mosmarrëveshjeve. I ftojmë të gjithë aktorët politikë që të zhvillojnë një komunikim paqësor dhe me respekt, duke nxitur bashkëpunimin dhe mirëkuptimin e ndërsjellë.
Dënojmë me vendosmëri çdo formë dhune, qoftë ajo verbale, psikologjike apo fizike, duke theksuar se dhuna minon vlerat demokratike dhe pengon përparimin e shoqërisë sonë. Le të punojmë së bashku për të krijuar një mjedis ku mosmarrëveshjet zgjidhen përmes diplomacisë, respektit dhe mirëkuptimit.
Dhuna nuk ka vend në politikë, dialogu duhet të jetë rruga e vetme për të ecur përpara.
Task Forca Kundër Dhunës ndaj Grave në Politikë
