Në një fjalim të mbajtur gjatë protestës qytetare para Bashkisë së Tiranës, Sekretari i Përgjithshëm i Partisë së Lirisë, Tedi Blushi, akuzoi qeverinë dhe drejtuesit e Bashkisë së Tiranës për lidhje të ngushta me krimin e organizuar dhe korrupsionin. Blushi deklaroi se Shqipëria është një nga vendet e fundit në Europë dhe botë ku krimi mbrohet me policë, duke e cilësuar situatën si një “narkoshtet”.
“Jemi ndoshta vendi i fundit në Europë dhe botë ku krimi mbrohet me policë,” tha Blushi. “Kjo tregon dhe njëherë fytyrën kriminale të këtij narkoshteti që ka kapur dhe sistemin e drejtësisë.”
Blushi kritikoi ashpër mënyrën se si drejtësia shqiptare trajton krimin dhe korrupsionin në radhët e qeverisë dhe administratës lokale. Ai theksoi se në asnjë vend demokratik një organizatë kriminale si ajo në Bashkinë e Tiranës nuk mbrohet me forca speciale policie dhe një drejtësi të kapur.
“Në asnjë vend të botës demokratike, një hajdut dhe një organizatë kriminale si kjo në Bashkinë e Tiranës nuk mbrohet me forca speciale policie dhe një drejtësi e kapur,” shtoi ai.
Blushi akuzoi kryetarin e Bashkisë së Tiranës, Erion Veliaj, dhe kryeministrin Edi Rama për lidhje me krimin e organizuar, duke kërkuar arrestimin e tyre nga SPAK. “SPAK duhet të përgëzohet vetëm atëherë kur të arrestojë Edi Ramën dhe Erion Veliajn,” tha Blushi. “Ndryshe kemi të bëjmë me një strukturë drejtësie të kapur nga Rama, aleate me të dhe Veliajn dhe partnerë të tyre në krim.”
Blushi theksoi se nuk mund të ketë drejtësi në vend pa arrestimin e dy “kokave kryesore të krimit të organizuar”, duke përmendur konkretisht Veliajn dhe Ramën. “Nuk ka drejtësi në këtë vend pa ndaluar dy kokat kryesore të krimit të organizuar, pa arrestuar Erion Veliajn, i cili duhet të ishte arrestuar 4 vite më parë,” deklaroi ai.
“Pa arrestuar Edi Ramën që ka firmosur 17 vendime për inceneratorët për dy orë. Në çfarë vendi demokratik ndodh kjo?” pyeti Blushi, duke ngritur shqetësime për mënyrën se si drejtësia mbyll sytë para krimeve dhe korrupsionit në vend.
