Bashkia e Tiranës ka hapur procedurat për aplikimet për kredi të buta, por në praktikë procesi është bllokuar për shkak të mosfunksionimit të portalit e-Albania, duke i lënë qytetarët pa mundësi për të përfituar nga programet e strehimit social.
Sipas njoftimit zyrtar, aplikimet për fazën e parë duhet të kryhen nga data 20 prill deri më 19 maj 2026, ekskluzivisht përmes portalit e-Albania. Megjithatë, përdoruesit raportojnë se sistemi nuk funksionon dhe aplikimi është i pamundur.
Dhjetëra denoncime tregojnë se problemi lidhet me ndërprerjet në komunikimin me Regjistrin Kombëtar të Gjendjes Civile. Vetë portali ka pranuar publikisht se po kalon në procese mirëmbajtjeje, por situata në terren paraqitet shumë më e rëndë, me bllokim të plotë të shërbimit.
Pamundësia për të aksesuar platformën po sjell pasoja të drejtpërdrejta për qytetarët, përfshirë bllokimin e aplikimeve, vonesa në regjistrime dhe pamundësi për të përmbushur detyrime ligjore. Kjo situatë rrezikon që shumë aplikantë të humbasin të drejta të garantuara me ligj për shkak të problemeve teknike.
Çdo ndërprerje e sistemit, edhe kur paraqitet si e përkohshme, krijon pasiguri dhe kosto shtesë për qytetarët që varen nga shërbimet digjitale për procedura jetike si strehimi.
Ndërkohë, në tre vitet e fundit janë shpenzuar mbi 8.5 milionë euro për mirëmbajtjen dhe përmirësimin e sistemit të gjendjes civile, por rezultatet nuk reflektohen në funksionimin e tij.
Situata ngre pikëpyetje për menaxhimin e fondeve publike dhe përgjegjësinë institucionale, në një kohë kur Prokuroria e Posaçme ka sekuestruar mbi 40 milionë euro në kuadër të hetimeve që lidhen me sistemet digjitale të administratës.
