Dhoma Amerikane e Tregtisë i ka dërguar qeverisë një letër me disa kërkesa, për të lehtësuar pasojat ekonomike të COVID-19.
Letra i është drejtuar kryeministrit, Edi Rama, Ministres së Financave, Anila Denaj, Ministrit për Sipërmarrjen, Eduard Shalsi dhe Ministrit për Rindërtimin, Arben Ahmetaj.
Dhoma Amerikane e Tregtisë kërkon akses në Fondet e Emergjencës COVID-19 për të gjitha bizneset, në mënyrë që të vazhdojnë aktivitetin. Gjithashtu kërkohet që kreditë që do të merren në kuadër të fondit të garancisë, për të mbuluar pagat e punonjësve, të akordohen me norma interesi minimale ose zero dhe borxhi të pezullohet derisa bizneset të marrin veten.
Një kërkesë tjetër është shtyrja e parapagimit të taksave për vititn 2020.
Gjithashtu kërkohet konsultimi me palët e interesit, përpara se të merren vendime që prekin biznesin.
Dhoma Amerikane e Tregtisë ka bërë edhe tre rekomandime shtesë, të cilat janë:
Zhvillimi i gjyqeve online për bizneset që kanë nevojë.
Përmirësimi i platformave “e-albania”, “QKB” dhe “AKSHI”
Eleminimin e TVSH-së për produktet ushqimore dhe mjekësore
Leter-e-AmCham-lidhur-me-masat-ekonomike-COVID-19_Final-2
Qeveria ka miratuar një paketë në ndihmë të biznesit, ku i lejon që të marrë kredi, nëse nuk mund të shlyejë pagat e punonjësve.
Vlera e huasë për bizneset, nuk duhet të kalojë 3 paga mujore dhe vlera e pagës së një punonjësi nuk mund të jetë më e lartë se 150 mijë lekë.
Në çdo rast dhënia e kredisë do të realizohet sipas politikave të brendshme të çdo banke në lidhje me riskun e kredisë, por bankat e nivelit të dytë do të sigurojnë procedura të thjeshtuara dhe kohë shumë të shpejtë të procesimit të kerkeses së kredisë.
Në instrumentin e kredisë së garantuar nga kredia sovrane, biznesi mund të përfitojë një periudhë pa pagesë principali, jo më pak se 3 muaj.
Bankat e nivelit të dytë nuk do të aplikojnë kosto administrative mbi kredinë dhe do të ofrojnë një normë interesi preferenciale, të barabartë me normën mesatare të interesit të tre ankandeve të fundit të bonove të thesarit 12 mujore plus një marzh prej 0.5%, por në asnjë rast jo më të lartë se 2.85%.
Subjektet private duhet të përcjellin kërkesat e aplikimit për kredi pranë njërës prej bankave të nivelit të dytë, jo më vonë se 30 ditë nga data e nënshkrimit të Marrëveshjes së Garancisë Shtetërore mes Këshillit të Ministrave dhe Bankës përkatëse.
