Vazhdojnë aksidentet në pune dhe ditën e sotme viktima është shënuar në kryeqytet.
Një ngjarje e rëndë ka ndodhur sot në Tiranë, ku një punëtor ka humbur jetën pasi ka rënë nga lartësia e një pallati në kryeqytet. Ngjarja ndodhi në rrugën Kasem Shima në Tiranë. Mësohet nga burimet se viktima është rreth 50 vjeç. Ai eshte identifikuar si Krenar Aliu.Ende nuk dihen rrethanat e ngjarjes ndërsa policia ka nisur punen per zbardhjen e ngjarjes.
“Tiranë/Informacion paraprak
Më datë 10.05.2022, rreth orës 16:55, në rrugën “Kasem Shima”, dyshohet se aksidentalisht ka rënë nga kati i gjashtë i një banese ku ishte duke punuar, shtetasi K. A., 50 vjeç, i cili si pasojë ka ndërruar jetë.
Grupi hetimor ndodhet në vendngjarje dhe po punon për sqarimin e rrethanave të ngjarjes”, thuhet në njoftimin e policisë së shtetit.
Vlen të përmendim se aksidentet në vendin e punës kanë qenë ndër vite në fokus të Inspektoratit të Punës, kryesisht sektorët e ndërtimit dhe ai minerar, që raportohet si më problematik.
Megjithatë, është vënë re një ulje e ndjeshme e numrit të aksidenteve vitet e fundit. Kreu i ISHPSHSH, z. Ardit Kaja, është shprehur më herët për “Monitor” se, rol të rëndësishëm në parandalimin e aksidenteve në punë luan forcimi i bashkëpunimit nëpërmjet të gjitha institucioneve dhe autoriteteve kompetente sipas specifikave përkatëse në trajtimin dhe hetimin e çdo ngjarje apo aksidenti të ndodhur.
