Autoriteti për Informim mbi Dosjet e Sigurimit te Shtetit deklaroi se një zyrtar i lartë publik, me inicialet I.M., ka qenë pjesë e Sigurimit të Shtetit.
Ndërkohë ish-kryeministri, Sali Berisha ka akuzuar kryeministrin, Edi Rama për trillimin e dosjes ku u aludua se ish presidenti Ilir Meta kishte qenë pjesë e Shërbimit Informativ.
Berisha tha se kjo ishte një shpifje e keqmenduar ndaj kundërshtarit politik, ndërsa shtoi se shtetasi I.M për të cilin thuhej se ishte Ilir Meta, në fakt ishte Ilir Murati nga Librazhdi. Po ashtu edhe Filip Tare i cili u spiunua nga shtetasi I.M ishte nga Librazhdi.
“Unë deklarova dy ditë më parë që gjithçka është një trillim i paskrupujt i Edi Ramës. I një njeriu që pa asnjë moral përdor shpifjen dhe trillimin kundër kundërshtarit politik. Nuk ka akt më të shëmtuar, sepse unë i kam ato aktet në dorë. Edi Rama e ka bërë në mënyrën më të trashë këtë kurth. Cilido që lexon email-in e ka të qartë se I.M është Ilir Murati nga Librazhdi dhe Filip Tare është nga Librazhdi dhe nuk ka asnjë lidhje me Ilir Rexhep Metën. Edi Rama ka keqshfrytëzuar në mënyrën më të shpifur qoftë kryetaren e Autoritetit të Dosjeve, qoftë Linda Nikollën. Unë mund t’ju them ju se në dokumentin e drejtuar Linda Nikollës, akuzon direkt Ilir Metën për bashkëpunëtor të Sigurimit të Shtetit”, u shpreh Berisha.
