Në fjalimin e tij të përnatshëm para mbështetësve, kreu i Partisë Demokratike, Sali Berisha, falënderoi publikisht prokuroren që firmosi sekuestrimin e 50 milionë eurove të atij që e quan klani Boçi, të cilat tha se janë të lidhura me figura si Edi Rama dhe Erion Veliaj.
“Miqtë e mi, kjo dramë që u luajt në dyert e Skrapit të partisë është një apel për çdo shqiptar të ngrihemi. Të ngrihemi se pa drejtësi nuk ka liri,” tha Berisha. Ai kritikoi ashpër sistemin aktual të drejtësisë, duke e quajtur atë “drejtësi e krimit” dhe “drejtësi e narkoshtetit.”
Berisha theksoi se Shqipëria ka juristë të shkolluar në shkollat më të mira të botës dhe se edhe në sistemin aktual ka profesionistë të ndershëm që janë të gatshëm të zbatojnë ligjin dhe Kushtetutën. Ai përshëndeti “prokuroren guximtare që firmosi sekuestrimin e pasurive të klanit Boçi”, duke theksuar se ky akt është një shembull i ndershmërisë dhe integritetit.
“Jam këtu për të përshëndetur prokuroren guximtare që firmosi sekuestrimin e 50 milionë eurove të klanit Boçi, të lidhur me Edi Ramën këmbë e kokë; të klanit Boçi, të lidhur me Erion Velinë këmbë e kokë; të klanit Boçi, të lidhur me Velicën këmbë e kokë,” shtoi ai. Berisha gjithashtu përmendi se gruaja e Boçit ka qenë këshilltare e Edi Ramës dhe se prokurorja, pavarësisht rrogës së ulët dhe mungesës së mbrojtjes, ka treguar nder dhe integritet në marrjen e këtij vendimi.
Në fund, Berisha u bëri thirrje qytetarëve të Shqipërisë që të ngrihen për drejtësi dhe liri, duke theksuar se vetëm një sistem drejtësie i ndershëm mund të sigurojë një të ardhme më të mirë për vendin.
