Kreu i Partisë Demokratike, Sali Berisha, është paraqitur paraditen e sotme në Prokurorinë e Posaçme, në kuadër të zbatimit të masës së sigurisë “detyrim paraqitje”.
Ai qëndroi vetëm pak minuta në ambientet e institucionit, ndërsa jashtë godinës u prit nga mbështetësit e tij.
Berisha është nën hetim në lidhje me çështjen e njohur si “Partizani”, ku ndaj tij rëndon akuza për “korrupsion pasiv të funksionarëve të lartë shtetërorë ose të zgjedhur vendorë”. Në këtë dosje është i përfshirë edhe dhëndri i tij, Jamarbër Malltezi, i cili akuzohet për “korrupsion pasiv” dhe “pastrim të produkteve të veprës penale ose veprimtarisë kriminale”.
Ndër të hetuarit është edhe biznesmeni Fatmir Bektashi, ndaj të cilit rëndon akuza për “korrupsion aktiv të funksionarëve të lartë shtetërorë”, si dhe Xhimi Begeja dhe Andia Pustina, të dyshuar për “pastrim parash”.
Në seancën e datës 7 korrik 2025, Gjykata e Posaçme vendosi lirimin nga arresti shtëpiak për Malltezin, duke e zëvendësuar masën me garanci pasurore në vlerën e 3 milionë lekëve, pas rreth 20 muajsh izolimi në banesë. Hetimet për këtë çështje vijojnë.
