Ish-kryeministri i Shqipërisë Sali Berisha deklaroi sërish nga Foltorja e Kuvendit se Bordet e Transparencës janë “shushunja që po u pinë gjakun shqiptarëve.”
Duke iu drejtuar kryeministrit Edi Rama që nuk ndodhej më në sallë, ai e cilësoi këtë të fundit “një bastard i bllokëmenëve hoxhistë”, si dhe shtoi se e ai vetë tashmë e pranoi që ka zgjedhur metoda komuniste për të përballuar krizën.
“Prej kohësh janë denoncuar bordet, dhe sot një bastard i bllokëmenëve hoxhistë e konfirmoi këtu krenarisht se me këtë metodë komuniste ka gjetur shpëtimin e qytetarëve shqiptarë. Unë bordet i denoncoj si shushunja që po u pinë gjakun e po futin në depresion me çmimet stratosferike. Ai që ia mbathi, kjo zonja këtu bëhet parzmore e tij duke shkelur rregulloren në çdo nen. Ai tha që po bën heroizëm me energji. Ky vend nuk prodhon as nga nafta as nga gazi, gjithë energjinë e ka nga burimet ujore.”
Po ashtu, lideri historik i PD, iu përgjigj me tone të ashpra replikës së kryeministrit Edi Rama nga foltorja e Kuvendit, duke e akuzuar se ka humbur çdo sens realiteti. “Ky ka gjet se sa ngrihem unë të flas ky ik. Po kjo s’më pengon mua që t’ia them në sy. Dhe do t’ia them shesh më shesh rrugë më rrugë, e gjithë Shqipëria do të ngrihet në këmbë se nuk durohet më kjo gjendje. Vidhni në mënyrë të padurueshme.” -shtoi ai
Në vijim Berisha e akuzoi Ramën se ka shkelur me këmbë sakrificat dhe gjakun e 12 mijë shqiptarëve të vrarë në Kosovë nga forcat serbe, teksa i është bindur urdhërave të padronit të tij në Beograd, Aleksandër Vuçiç. “Skllavi i Vuçiçit shkel gjakun e 1400 fëmijëve në Kosovë”,- theksoi ai
Gjithashtu, duke u nisur nga incidenti që ndodhi më herët gjatë ditës në seancën plenare, Berisha e cilësoi kryeparlamentaren Lindita Nikolla, “parzmore të kryeministrit” dhe që është e gatshme për të thyer rregulloren në çdo nen të saj.
