Të hënën, në Gjykatën e Posaçme (GJKKO), pritet të zhvillohet seanca vendimtare për çështjen “Partizani”, ku do të merret vendimi nëse dosja do të kalojë për gjykim.
Në këtë proces, të akuzuar nga SPAK janë ish-kryeministri Sali Berisha, dhëndri i tij Jamarbër Malltezi dhe biznesmeni Fatmir Bektashi.
Në seancën e mëparshme të mbajtur më 27 prill, avokatët e Berishës kërkuan përjashtimin e gjyqtares së çështjes, Flojera Davidhi, por kërkesa u rrëzua. Si rrjedhojë, do të jetë po kjo gjyqtare që do të vendosë mbi fatin e dosjes.
Procesi paraprak ndaj Berishës dhe të pandehurve të tjerë ka hyrë në muajin e shtatë, ndonëse ligji parashikon që kjo fazë të përmbyllet brenda një muaji.
Sali Berisha akuzohet për korrupsion pasiv në privatizimin e kompleksit sportiv “Partizani”. Jamarbër Malltezi, për korrupsion dhe pastrim parash – aktualisht në arrest shtëpie.
Ndërsa Fatmir Bektashi, për korrupsion, dhe ndodhet nën masën e detyrimit për t’u paraqitur në gjykatë.
