Sali Berisha uroi shqiptarët për 9 Majin, Ditën e Europës, duke theksuar se rruga e Shqipërisë drejt BE-së ishte e pandalshme deri në vitin 2013 falë reformave të kryera. Sipas tij, ardhja në pushtet e Edi Ramës atë vit ndaloi progresin për shkak të lidhjeve të qeverisë me krimin, drogën dhe korrupsionin.
“Rruga e Shqipërisë drejt projektit Europian nuk ka qenë e lehtë, por çon drejt të ardhmes më të mirë për shqiptarët. Deri në vitin 2013, kjo ishte një rrugë e pandalshme. Por me ardhjen e Edi Ramës dhe rilindësve në pushtet, çdo ditë në rrugën e integrimit europian u ndërtuan muret e tmerrshme të korrupsionit, drogës dhe krimit të organizuar,” tha Berisha.
Ai theksoi se Shqipëria është i vetmi vend në Europë ku qytetarët varfërohen çdo vit. Në vitin 2013, ata ishin me rrogat më të larta në rajon, por sot kanë pagat më të ulëta për shkak të korrupsionit dhe vjedhjeve të qeverisë.
“Shqipëria është i vetmi vend në Europë ku qytetarët varfërohen çdo vit. Në vitin 2013, ata ishin me rrogat më të larta në rajon. Sot, për shkak të vjedhjes së papërmbajtur të fondeve publike dhe pasurive natyrore nga pushteti i Edi Ramës, ata kanë rrogat më të ulëta se të gjithë kombet e tjera të rajonit,” shtoi Berisha.
Ai bëri thirrje për mosbindje civile për të “shkallmuar dyert e mbyllura nga krimi, vjedhjet dhe dhunimi i votës”.
“Duhet të ngrihemi dhe të shkallmojmë me mosbindje civile dyert e mbyllura nga krimi, vjedhjet e shfrenuara të qeveritarëve dhe dhunimi i votës,” theksoi Berisha.
Në fund, Berisha shprehu mirënjohjen për popujt e vendeve anëtare të BE-së për bujarinë dhe solidaritetin e tyre të jashtëzakonshëm ndaj Shqipërisë.
“Dua të shpreh mirënjohje të pakufishme për popujt e vendeve anëtare të BE-së për bujarinë dhe solidaritetin e tyre të jashtëzakonshëm,” përfundoi Berisha.
