Kryedemokrati Sali Berisha ka kritikuar ashpër qeverinë Rama gjatë tubimit qytetar te ‘Rruga e Shpresës’, duke u ndalur tek vendimi i Bashkimit Europian për të ndërprerë fondet IPARD për bujqësinë shqiptare. BE ka ndërprerë 140 milionë euro për fermerët shqiptarë, një vendim që Berisha e lidh drejtpërdrejt me korrupsionin qeveritar të hetuar nga organizmat e drejtësisë europiane.
“BE ndërpreu 140 milionë euro për fermerët shqiptarë sepse Edi Rama dhe Erion Veliaj vodhën paratë e taksapaguesve europianë,” deklaroi Berisha. Ai theksoi se ky është një krim i madh që ka zhytur në varfëri fëmijët e vendit, duke theksuar se 18% e fëmijëve shqiptarë nuk kanë më shumë se një apo dy vakte në ditë.
Berisha vazhdoi akuzat e tij duke thënë se Edi Rama dhe zyrtarët e tij kanë shkatërruar Shqipërinë përmes korrupsionit dhe vjedhjeve. “Miqtë e mi, këta vjedhin çdo gjë. A nuk njoftoi BE se ndërpreu fondet për shkak se Edi Rama, këshilltarët e tij, dhe Erion Veliaj kishin vjedhur paratë e taksapaguesve të BE?” shtoi ai. Berisha e cilësoi këtë akt si një “vrasje me dashje” ndaj fëmijëve shqiptarë, duke akuzuar qeverinë për mungesë shpirti, ndjenjash dhe morali.
Në fjalën e tij, Berisha gjithashtu kritikoi institucionet vendase për amnistimin e këtyre vjedhjeve, duke akuzuar Dumanin dhe Zamanin për mbrojtjen e një grupi të strukturuar kriminal në Skrapar që mbron korrupsionin e qeverisë Rama dhe zyrtarëve të tij.
