Vetting-u vijon të ‘presë kokat’ e gjyqtarëve dhe prokurorëve abuzivë më të njëjtin intensitet si gjatë vitit të kaluar.
Komisioni i Pavarur i Kualifikimit, me trupë gjykuese të përbërë nga Pamela Qirko, Xhensila Pine dhe Genta Tafa Bungo, ka shkarkuar dje nga detyra kryetarin e Gjykatës së Sarandës, Alltun Çela.
Ky i fundit kishte probleme të rënda në të tre kriteret, ligjshmërinë e pasurisë, pastërtinë e figurës dhe aftësitë profesionale, ku spikaste edhe kthimi i një ambienti stadiumi në banesë, pa asnjë lloj dokumentacioni.
“Komisioni i Pavarur i Kualifikimit njofton se, pas shqyrtimit të dokumentacionit dhe zhvillimit të seancës dëgjimore më datë 04.01.2018 për subjektin e rivlerësimit, z. Alltun Çela, bazuar në ligjin nr. 84/2016, sot, më datë 08.01.2018 vendosi: Shkarkimin nga detyra të subjektit të rivlerësimit, Alltun Çela, kryetar i Gjykatës së Rrethit Gjyqësor Sarandë. Vendimi i arsyetuar me shkrim nga trupa gjykuese e kryesuar nga znj. Pamela Qirko, znj. Genta Tafa (Bungo) relatore, znj. Xhensila Pine anëtare, do t’u njoftohet subjektit të rivlerësimit, komisionerëve publikë dhe vëzhguesve ndërkombëtarë brenda 30 ditëve.
Ndaj këtij vendimi, mund të ushtrohet ankimim pranë Kolegjit të Posaçëm të Apelimit nga subjekti i rivlerësimit dhe/ose Komisioneri Publik 15 ditë nga data e njoftimit të vendimit të Komisionit. Ankimi depozitohet pranë Komisionit të Pavarur të Kualifikimit.”- thuhet në njoftimin e KPK.
