Astrit Kapaj është një nga hajdutët më të jashtëzakonshëm në Britaninë e Madhe, i cili për 10 vite arriti që të grabiste 10 milion paund.
Sipas “Top Story”, viktimat e shqiptarit ishin VIP-at, midis të cilëve tenisti Boris Becker dhe futbollisti, Nikolas Anelka.
Kapaj konsiderohej si ekspert, edhe pse në të shumtën e rasteve pronarët i linin shtëpitë të hapura.
Tentativa e parë për ta arrestuar ishte në 2016-ën, ku 30 policë u vunë në ndjekje të tij, pas këqyrjes së pamjeve të sigurisë.
Gazetari i “Daily Mail”, Stephan Wright, tregon se shqiptari gjatë grabitjeve mbante maskë, ndërsa ishte shumë i kujdesshëm për të mos lënë gjurmë.
Njëra prej denoncueseve shprehet se Kapaj nuk vidhte sende dosido, por varëse floriri, ora Rolex dhe para të thata.
Trofeu më i madh i tij është një orë Rolex Submariner e vitit 1955, me vlerë 500 mijë paund.
Mirëpo Astrit Kapaj nuk shpenzonte para dhe nuk kishte rënë në sy as nga banorët e fshatit Gjorm në Vlorë dhe as nga vëllai i tij.
Shqiptari nuk blinte veshje apo makina luksoze, ndërsa familja e tij njihej për faktin se ishin shumë të varfër dhe ish-të persekutuar.
Ndërkohë një komshie tregon se me sa vështirësi janë rritur Astriti dhe motrat e tij.
Vëllai i madh i Astritit, Nexhipi, ka në pronësi një dyqan të vogël në fshat ngritur në tokën e trashëguar nga babai i tyre.
Ai tregon, se Astriti vinte një herë në 2 vjet dhe u thoshte se punon, por ata nuk dinin asgjë për jetën e tij të dyfishtë.
Falë historisë së tij, familjen e Astritit tashmë e njeh i gjithë fshati Gjorm.
Gjithashtu gazetarët e “Daily Mail” udhëtuan në fshatin e Astritit për të parë nëse ai i dërgonte aty sendet e vjedhura, por ishte e kotë.
Familjarët e tij nuk dinin asgjë, ndërsa Nexhipi, i vëllai i Astritit, njihet pasi trasporton me furgon mësuesit drejt Vlorës.
“Fola me vëllain e tij. Mesa pashë, ishte një njeri shumë i rregullt. Nuk kishte asnjë dijeni për krimet. Nuk ishte krenar që i vëllai kishte kryer këto shkelje. Besoj se kishte një farë turpi nga familja e tij. Një nga gjërat që më interesonte mua, ishte nëse kishte përdorur paratë e vjedhura në Londër për të ndërtuar prona ose për të pastruar paratë në Shqipëri. Nuk kishte prova që mund të ta vërtetonin këtë”, tha Stephan Wright, Gazetar “Daily Mail”.
