Pas arrestimit të Fredi Belerit kandidatit të koalicionit ‘Bashkë Fitojmë’ për bashkinë e Himarës, ka reaguar edhe ministri i Jashtëm grek, Nikos Dendias. Ky i fundit njoftoi se kjo çështje do të ndiqet edhe nga Greqia dhe nëse nuk ka prova për arrestimin e Belerit, atëherë është një skandal i madh. Kujtojmë se Beleri i përket minoritetit grek në Himarë.
“Arrestohet anëtari i minoritetit grek, Fredi Beleri, kandidat për kryetar Bashkie në Himarë të Shqipërisë, së bashku me një tjetër grek. Dua të them se nëse nuk ka prova të forta, arrestimi i një kandidati për Kryetar Bashkie dy ditë para zgjedhjeve është një skandal absolut.
Për këtë kam njoftuar tashmë Përfaqësuesin e Lartë të BE-së, z. Borrell, dhe Ministrin e Punëve të Jashtme suedeze, si Presidencë në detyrë. Qeveria greke do ta monitorojë këtë nga afër.
E përsëris, diçka që e njohu edhe kryeministri shqiptar Rama. Arrestimi i një kandidati për kryetar Bashkie dy ditë para zgjedhjeve, nëse nuk ka prova të forta, përbën skandal.”, tha ai.
Ndërkohë ambasadorja e Greqisë në Tiranë ka informuar ambasadorët e vendeve anëtare të BE-së në Shqipëri për rastin e arrestimit të Fredi Belerit.
Ambasadorja e Greqisë në Shqipëri, Konstantina Kamitsi, pas udhëzimeve të ministrit të Jashtëm, Nikos Dendias, është nisur për në Komisariatin e Policisë së Vlorës, për të takuar nga afër Belerin, kandidatin e koalicionit Bashkë Fitojmë për Bashkinë e Himarës.
Më herët, sipas një njoftimi të Ministrisë së Jashtme, ambasadorja greke kishte bërë një vizitë përkatëse në Ministrinë e Jashtme të Shqipërisë.
Prokuroria e Vloës pretendon se ka prova të shitblerjes së votave nga Beleri, dhe për këtë ka firmosur edhe arrestimin e tij paraditen e sotme.
