Ish-trajneri i kombëtares shqiptare të futbollit, Edy Reja, ka folur përpara ndeshjes mes Italisë dhe Shqipërisë, duke vlerësuar punën e bërë nga trajneri aktual i Shqipërisë dhe skuadrën shqiptare.
Reja shprehu admirim për arritjet e trajnerit të ri të Shqipërisë, i cili ka kualifikuar ekipin në krye të grupit të tyre, duke lënë pas Republikën Çeke dhe Poloninë. “Është i zoti, ka bërë një punë të madhe duke arritur objektivin,” tha Reja, duke përmendur se shumë nga lojtarët aktualë të ekipit ishin të tij gjatë kohës kur ai drejtonte kombëtaren, përfshirë Ramadani, Asllani, Gjimshiti, Mitaj dhe Bajramin, të cilin ai e bindi të luante për Shqipërinë.
Përsa i përket sfidës ndaj Italisë, Reja theksoi se Shqipëria nuk duhet nënvlerësuar. Ai përmendi se ekipi shqiptar është rritur shumë që nga viti 2016 dhe është shumë i fortë nga pikëpamja karakteriale. “Spalletti duhet të shikojë Bajramin mes linjave,” tha Reja, duke shtuar se lojtarët e krahut si Asani, Hoxha dhe Seferi janë shumë të shpejtë dhe mund të jenë një rrezik i madh në kundërsulm. Reja paralajmëroi se kundërsulmet do të jenë rreziku kryesor për Italinë, duke theksuar rëndësinë e moslejimit të hapësirave për lojtarët shqiptarë.
Në fund, Reja theksoi se prania e 15-20 mijë tifozëve shqiptarë në Dortmund do të krijojë një atmosferë të jashtëzakonshme dhe se kjo ndeshje do të jetë një sfidë vendimtare për të dyja ekipet. “Do të më pëlqente nëse Shqipëria do të bënte një figurë të mirë, por do të bëj tifo për Italinë,” përfundoi Reja.
