Kreu i Partisë Demokratike, Lulzim Basha ditën e sotme po zhvillon një tjetër takim elektoral për zgjedhjet e 25 prillit, në qytetin e Kukësit. Ajo që vihet re nga ky takim si edhe në takimet e tjera elektorale të kryedrmokratit janë grumbullimet masive të njerëzve, pa respektuar distancën dhe pa maska.
Basha i ka thënë qytetarëve të Kukësit se Rama i ka poshtëruar e diskriminuar për 8 vite, por i ka bërë gabim hesapet me kuksianët. Ai ka premtuar se do e kthejë Kukësin në kryeqendrën e Verilindjes dhe do të hapë një inkubator të teknologjisë dhe informacionit në bashkëpunim me një universitet në Austri.
“Mirë se ju gjej, vëllezër dhe motra, kuksiane e kuksian fisnik. Mirë se ju gjej në Kukësin e fisnikërisë, në Kukësin që do i prijë ndryshimit dhe fitores. Për 8 vjet, qeveria dhe kryeministri në ikje e kanë shkelur Kukësin me këmbë, duke e shkatërruar ekonomitë tuaja familjare, ju kanë nëpërkëmbur, tallur. I ka bërë hesapet gabim, ora po vjen. Dita e ndryshimit. Për 8 vjet kam qenë në mesin tuaj, në rrugët e këtij qyteti, në shtëpitë tuaja, në zhegun e llambës e ngricën e dimrit, e kam ndjerë zemrën kuksiane, optimizmin.
Më 25 prill vullkani i ndryshimit do të bëjë që kuksianët dhe bijtë e tyre do të jetojnë me dinjitet, këtu në Kukësin tuaj, në Kukësin tuaj. Ndryshim do të thotë mirëqenie, mirëqenie do të thotë paga dinjitoze. Që vjen nga një ekonomi që prodhon, hap vende pune. Shumë shpejt do të marrë fund diskriminimi. Ju jap fjalën një ndër inkubatorët e teknologjisë së informacionit në bashkëpunim me universitetin në Austri do të hapet këtu në Kukës. Jo thjesht dhe vetëm me një qendër arsimimi dhe kualifikimi, investime amerikane, gjermane, austriake, do e kthejmë në atë që e ka bërë zoti, kryeqendër të Verilindjes. Ju falënderoj nga zemra, që kur nuk u dorëzuat. 8 vite dështime, 8 vite diskriminim, 8 vite poshtërim, 8 vite varfëri, mos i harroni, më 25 prill asnjë votë për atë që ju poshtëroi. Votat tuaja për Partinë Demokratike. Zoti e bekoftë Kukësin dhe kuksianët, fitore!’’- tha Basha.
https://www.facebook.com/lulzimbasha.al/videos/494444941558124
