Kryedemokrati Lulzim Basha e ka nisur këtë vit të ri me një sulm ndaj kryeministrit Edi Rama, pasi ky i fundit njoftoi sigurimin e vaksinës anticovid.
Basha ka thënë se Rama po i shet dështimet si suksese, sepse dozat janë shumë të pakëta për Shqipërinë dhe është tepër vonë shpërndarja e tyre në krahasim me vendet e tjera. Ai ka vijuar me akuzat duke shtuar se në New York ka shkuar për të blerë këpucë të reja.
“Si përherë Rama përpiqet t’i shesë dështimet si suksese. Shqipëria është vendi që jep ndihmën më të vogël ekonomike për qytetarët e saj. Rama premton të sjellë shumë pak vaksina, dhe shumë vonë krahasuar me vendet e tjera. Serbia dhe Maqedonia e Veriut kanë nisur ndërkohë vaksinimin, ndërsa Rama shkoi në Nju Jork për të blerë këpucë të reja! Ky i dështuar duhet të largohet nga qeverisja, që Shqipëria të ndryshojë e të shpresojë sërish”, shkruan Basha.
Në një videomesazh kryeministri Rama tha: “Në përfundim të vitit të kaluar dhe në vigjilje të Vitit të Ri, siguruam 500 mijë dozat e para të vaksinës me Pfizer.
Kemi dakordësuar me Akt Normativ për aktivizimin e kontratës. Sasia e dakordsësuar do të paguhet menjëherë 10.700 dozat e para do të vijnë në javën e tretë të janarit. Mbi 30 mijë të tjerat vijnë në shkurt. Ndërkohë që edhe me dy vende partnere kemi siguruar 9000 doza”.
/Gazetareforma.com/
