Kryetari i Partisë Demokratike Lulzim Basha ka dalë sot para mediave për të deklaruar se së shpejti do të nisë organizmi i zgjedhjeve primare në PD, duke marrë shembull modelin amerikan.
Basha nuk ka preferuar të flasë për takimin me zëvendës ambasadoren amerikane dhe as për deklaratat e kryeministrit Edi Rama bërë dje në Rai Uno.
“Dy ditë jashtëzakonisht të suksesshme me përfaqësues të institutit amerikan republikan. Kam vendosur të sjell standardet e demokracisë Perëndimore. Me modelin që ne do të ofrojmë deputetët e ardhshëm të PD, kandidatët a ardhshëm të PD për deputetë do të zgjidhen nëpërmjet parimit një anëtar, një votë”, tha Basha.
Ai theksoi se qëllimi nuk është vetëm largimi i Ramës por shembja e sistemit. “Ky është modeli që unë ofroj dhe PD e ka në statutin e saj. Shumë shpejt do nisim hapat për të organizuar primaret brenda PD-së. As komentet e njeriut shkaktarit të kësaj krize sot, nuk kam ndërmend t’i bëj pjesë të komunikimit tim. Populli ka folur, Edi Rama bën mirë të dëgjojë zërin e popullit. T’i hapë rrugë drejtësisë”, deklaroi kreu i PD.
Duke iu referuar marrëveshjes së 17 Majit, Basha tha se dialogu i tij me Ramen provoi se ishte i dëmshëm për vendin.
“Dialogu midis meje dhe Rames provoi të ishte i dëmshëm për interesat e Shqipërisë për mënyrën si u keqpërdor nga një njeri që hiqet si kryetar i PS, por është reduktuar në një bashkëpunëtor të krimit të organizuar dhe të oligarkëve grabitqarë që dëmtojnë interesat e shqiptarëve, dëmtojnë dhe interesat e socialistëve, dëmtojnë dhe interesat e demokracisë”- tha Basha.
I pyetur për takimin me zv.ambasadoren amerikane, Basha ka thënë se nuk komenton as deklaratat dhe as takimet me përfaqësues të partnereve strategjike.
“Opozita nuk ka asnjë hap pas, në luftën kundër krimit që ka asgjësuar zgjedhjet ka vetëm hapa përpara”- tha Basha.
