Kryetari i Grupit Parlamentar të Rithemelimit në Kuvend, Gazment Bardhi, ka folur sot në kuvend lidhur me portin e ri të Durrësit. Sipas tij vendimi i qeverisë për të financuar e 100% nga buxheti i shtetit është një akt korruptiv.
Nga foltorja e Kuvendit, ai e ballafaqoi ministren Balluku dhe kryeministrin Rama me 4 verisone të ndryshme financimi, të dhena prej tyre në më pak se 1 vit.
‘Në atë kohë kur kaloi ligji për portin aktual të Durrësit, u zotuan para Kuvendit dhe nuk ka akt më të rëndë sesa kur qeveria gënjen Kuvendin. U zotuan këtu se për portin e Durrësit nuk do jepnin asnjë çindarkë nga buxheti i shtetit. Sot do paguajnë 400 milion euro’, u shpreh Bardhi.
Sipas Bardhit Balluku dhe shefin e tij në qeveri kanë krijuar skema të korrupsionit me miliona euro, e për këtë, si shembull mori rastin e drejtorit të Autoritetit Rrugor.
‘Këta të dy bëjnë sikur nuk kanë dijeni. Sikur jetojnë në hënë. Këta që kanë një sistem patronazhistësh dhe dinë se çfarë hanë shqiptarët në shtëpinë e tyre dhe nuk dinë se çfarë bëjnë drejtorët e tyre. Vetëm në një procedurë prokurimi, drejtori i autoritetit rrugor kishte vjedhur 1.5 milion euro’, tha ndër të tjera kreu i grupit parlamentar.
Gjatë kohës që Bardhi foli në Kuvend, ministrja Balluku u largua nga salla pa dhënë përgjigje, edhe pse gjatë gjithë ditës replikoi me deputetët për çështje të tjera.
