Aksi nacional Qukës-Qafë Plloçë u bllokua për disa minuta paraditen e së hënës, pasi banorët e zonës protestuan në afërsi të fshatit Kalivaç kundër mbylljes së rrugës së vjetër që lidh tre fshatra me segmentin e ri rrugor. Bllokimi shkaktoi ndërprerje të qarkullimit për dhjetëra mjete në të dyja drejtimet.
Gjatë protestës pati edhe përplasje mes banorëve dhe drejtuesve të mjeteve, ndërsa situata u tensionua për shkak të kërkesës së komunitetit për të mos humbur të vetmen dalje që përdorej prej vitesh.
Inxhinierët që mbikëqyrin projektin e aksit të ri deklarojnë se hyrja në këtë pikë përbën burim aksidentesh dhe duhet mbyllur për siguri. Por për banorët, kjo rrugë mbetet e pazëvendësueshme, pasi lidh jo vetëm fshatrat me rrugën kryesore, por edhe me tokat ku ata kanë shtëpitë dhe të mbjellat.
Protestuesit kërkojnë që rruga të rihapet ose të ofrohet një zgjidhje alternative që të mos i shkëpusë nga aktivitetet e përditshme dhe pronat e tyre. Autoritetet ende nuk kanë dhënë një përgjigje përfundimtare për kërkesat e tyre.
