Banorët e Laknasit në Kamëz janë ngritur sërish kundër ndërtimit të thertores në Pyllin e Brukës. Ata e kanë kundërshtuar vazhdimisht ndërtimin e thertores, duke qenë se zona është e gjelbëruar dhe pylli mbron banesat nga mbetjet e lumit të Tiranës dhe erozioni.
Ditën e sotme ata kanë pasur debate edhe me përfaqësuesit e firmës, pasi thonë se leja për kryerjen e ndërtimit ka mbaruar. Çështja është prej disa kohësh në proces gjyqësor dhe vendimi i ndërmjetëm në shkallën e parë ka siguruar pezullimin e punimeve, mirëpo në dhjetor të vitit 2020 Gjykata Administrative e Apelit ka rrëzuar masën e sigurisë duke i hapur rrugën firmës për të nisur ndërtimin.
Thertorja është planifikuar të ndërtohet pasi Bashkia e Kamzës ka nënshkruar një kontratë 20-vjeçare me firmën “BioProducts”, që është lidhur që në vitin 2018.
Ditën e sotme banorët kanë kërkuar nga përfaqëëuesit e firmës që t’i ndalin punimet, duke qenë se nuk kanë leje ndërtimi, pasi është në aplikim. Përfaqësuesit e firmës kanë thënë se kanë leje drejtimi dhe kanë 36 muaj kohë dhe se policia do t’i mbrojë nëse ka reagim nga ana e banorëve.
Pjesë nga debati i sotëm:
Përfaqësuesi i firmës: Ti ku merr leje për shtëpinë, merr leje te mua?
Banorja: Jo, se ma jep Bashkia
Përfaqësuesi i firmës: Edhe mua ma ka dhënë
Banorja: Kemi komunikuar me Bashkinë e Kamzës dhe ka thënë që nuk ka leje ndërtimi, është në aplikim. Ti s’ke leje drejtimi.
Përfaqësuesi i firmës: Kam leje drejtimi, kam 36 muaj kohë.
Banorja: Ka ardhë me letra false. Nuk je për këtë punë. Bashkia e Kamzës thotë nuk e rinovon më lejen. E kam pesë metra larg, këtu do të bëhet stalla?
Përfaqësuesi i firmës: Ne jemi në dijeni që ka përfunduar leja e ndërtimin. Ne pretendojmë që zotërinjve i ka skaduar dhe deklarata mjedisore dhe leja e drejtimit, që prej kur kanë aplikuar. Gjykata vendosi në fillim në favor të banorëve. Di të them tani që ata s’kanë më leje.
Përfaqësuesi i firmës 2: Nuk kemi nevojë të revoltohemi. Policia na mbron neve. Po të prek njeri me dorë? Nëse vepron kundër ligjit, policia ndërhyn. Rrini në mënyrë paqësore, kemi të drejtën tonë.
