Banorët e fshatit Hotolisht në Librazhd bllokuan këtë të shtunë për disa minuta rrugën kombëtare Librazhd–Përrenjas, në shenjë proteste ndaj projektit të zgjerimit të rrugës “Elbasan–Qafë Thanë”, që parashikohet të kalojë përmes zonës së banuar, duke prekur të paktën 25 banesa.
“Duam rrugë, por jo përçarje të komunitetit” ishte mesazhi i protestës simbolike, ku morën pjesë edhe fëmijë e të moshuar. Për rreth 15 minuta, banorët bllokuan rrugën si formë reagimi ndaj një projekti që sipas tyre rrezikon të shkatërrojë strukturën sociale dhe ekonomike të fshatit.
Prej më shumë se tetë muajsh, komuniteti ka kundërshtuar projektin përmes peticioneve, kërkesave zyrtare dhe kontakteve me autoritetet, por ende nuk kanë marrë asnjë përgjigje përfundimtare.
“Nuk jemi kundër rrugës, jemi kundër shkatërrimit të jetës sonë. Ka zgjidhje të tjera, mund të devijohet drejt luginës së Shkumbinit ose të ndërtohet tunel”, thanë banorët.
Një tjetër pikë e mospajtimeve është vlera e dëmshpërblimit 270 euro për metër katror që konsiderohet e papranueshme nga banorët.
“Provojeni vetë të ndërtoni shtëpi me kaq para. Është e pamundur. Për ne, kjo është pasuria e vetme”, u shpreh një protestues.
Pavarësisht paralajmërimeve të ministrisë së Infrastrukturës për rishikimin e projektit, në terren vazhdojnë përgatitjet për ndërtim, ndërsa mungesa e konsultimeve publike me komunitetin ka thelluar pakënaqësinë.
Informacionin për rrugën, banorët thonë se e kanë marrë vetëm në mënyrë jozyrtare, nga matjet e inxhinierëve në zonë.
Ata kanë dorëzuar një peticion me 511 firma në institucionet qendrore, duke kërkuar alternativë për këtë segment që është pjesë e fazës së tetë të projektit.
Segmenti nis afër kthesës për në Rrethin e Bardhë dhe përfundon pranë kthesës për në Xhyrë. Kontrata për këtë pjesë është fituar nga kompania “Fusha” sh.p.k., në korrik të vitit 2024.
Projekti i rrugës “Elbasan–Qafë Thanë” është pjesë e Korridorit të VIII dhe konsiderohet strategjik për lidhjen mes Durrësit dhe portit të Varnës në Bullgari.
Punimet nisën në janar 2023 dhe sipas Autoritetit Rrugor, vlera e të gjitha loteve të tenderuara deri tani arrin mbi 183 milionë euro, me afat përfundimi deri në vitin 2026.
Banorët e Hotolishtit kanë paralajmëruar se do të rikthehen në protestë të dielën e ardhshme, nëse nuk do të ketë një përgjigje konkrete nga autoritetet.
