Ndërsa një në 31 fëmijë sot lind me çrregullime të spektrit të autizmit, të ndikuara nga faktorë të ndryshëm gjenetikë ose ambientalë, një tjetër formë shqetësuese po përhapet: autizmi virtual, i nxitur nga përdorimi i hershëm i celularëve.
“Është njëlloj si autizmi klasik, me të njëjtat simptoma, duke sjellë vonesa në zhvillim dhe në të folur. Po ndeshim gjithnjë e më shumë fëmijë që fillojnë të flasin në moshën 3-vjeçare,” deklaron logopedi Elis Musaraj. Ai thekson se përdorimi i celularëve deri në moshën 2-vjeçare duhet të ndalohet në mënyrë kategorike.
Në Shqipëri, fëmijët që lindin me çrregullime të spektrit të autizmit diagnostikohen shpesh vonë, pasi as prindërit dhe as edukatoret në çerdhe apo kopshte nuk janë të trajnuar për të dalluar simptomat në fazat e hershme. Sipas Musarajt, ekspozimi ndaj ekraneve ndikon negativisht duke shtuar ankthin, sjelljet e përsëritura dhe duke vonuar aftësinë për komunikim.
Në një kohë kur numri i rasteve të autizmit po rritet ndjeshëm edhe në Shqipëri, ashtu si në vende të tjera, specialistët kërkojnë ndërhyrje urgjente nga strukturat shtetërore. Sipas tyre, mbështetja e familjeve me anëtarë me çrregullime të spektrit të autizmit duhet të shtrihet përtej përfitimeve nga kësti i aftësisë së kufizuar (kemp), duke përfshirë trajnim, terapi dhe shërbime mbështetëse të specializuara.
