Kandidati për deputet, Aulon Kalaja, ka depozituar një kallëzim penal në Prokurorinë e Posaçme, duke pretenduar se është bërë viktimë e manipulimit zgjedhor në datën 11 maj.
Sipas tij, rezultati i votave të tij është ulur artificialisht me 105 vota, ndërsa Komisioni i Ankimimeve dhe Sanksioneve ka ndërprerë në mënyrë të pashpjegueshme procesin e rinumërimit në Durrës, ndryshe nga sa ndodhi në Tiranë dhe Fier, ku kutitë u rinumëruan tërësisht.
“KAS vendosi të ndalojë rinumërimin, edhe pse unë dorëzova tetë prova të reja. Sipas tyre bëhet fjalë për gabime njerëzore, por unë besoj se kemi të bëjmë me një krim zgjedhor,” u shpreh Kalaja.
Ai ka kërkuar nga SPAK që të analizojë votat përmes pamjeve filmike, duke pretenduar se manipulimi i rezultatit është i dukshëm. “Dua që të analizohet se si janë dëmtuar votat e mia, si është ndryshuar ngjyra dhe forma e rezultatit,” theksoi ai.
Kalaja apelon që hetimet të thellohen dhe të zbardhet nëse kemi të bëjmë me një rast të qëllimshëm të deformimit të vullnetit të qytetarëve.
