Qyteti i Dimalit është kthyer në një pikë takimi për artin, traditën dhe historinë, duke mirëpritur një aktivitet festiv të dedikuar trashëgimisë kulturore.
Në një atmosferë festive, pedonalja e qytetit u mbush me ngjyra, muzikë dhe ritme popullore, duke krijuar një skenë ku u bashkuan breza të ndryshëm në emër të identitetit kulturor.
Të pranishmit patën mundësinë të shijojnë valle karakteristike të zonës, këngë tradicionale dhe ekspozita të punimeve artizanale.
Pjesë e veçantë e festës ishin veshjet popullore të ruajtura brez pas brezi, të rikrijuara me mjeshtëri nga nxënësit e shkollave lokale, një shembull frymëzues i lidhjes ndërbrezore me trashëgiminë.
Pjesëmarrja masive e komunitetit vendas i dha aktivitetit një dimension të thellë përfshirjeje dhe përkushtimi.
“Kjo është një festë që bashkon projekte edukative dhe artizanale, duke u dhënë zë shkollave dhe qendrave artizanale të zonës,” u shpreh Albano Kora, një nga organizatorët.
Ndërsa bashkëorganizatori Vilson Shehu theksoi rëndësinë e nismës për të ruajtur traditat që rrezikojnë të harrohen.
“Kjo festë sjell në jetë trashëgiminë tonë, është një projekt që lidh të kaluarën, të tashmen dhe të ardhmen e Dimalit,” tha ai.
Aktiviteti u prit me entuziazëm nga qytetarët, duke treguar edhe një herë sa fort lidhen banorët me rrënjët e tyre kulturore dhe historike.
