Detaje të reja janë zbuluar për atentatin në Lundër, ku katër persona u plagosën rëndë.
Grupi hetimor ka shkuar në katër lokacione të ndryshme, ku kamerat e sigurisë kanë regjistruar lëvizjet e dyshuara të autorëve.
Gjithashtu, janë marrë të dhëna nga qelizat e antenave telefonike për të ndjekur telefonatat e kryera në zonat ku kanë lëvizur autorët dhe për të identifikuar pronarët e numrave të përfshirë.
Hetuesit presin edhe përgjigjet e analizave të profileve gjenetike që janë dërguar për verifikim.
Po ashtu, pritet dhe dëshmia e babait të dy fëmijëve të plagosur për të sqaruar pistat kryesore që po ndiqen, të cilat janë dy.
Ngjarja ndodhi më 17 prill rreth orës 21:30, kur persona ende të paidentifikuar hapën zjarr ndaj një automjeti tip “G-Class” ku ndodheshin katër persona, Arenc Stafa 34 vjeç, Kian Mullahi 19 vjeç, dhe dy të miturit Dior Demiraj 11 vjeç dhe Marko Demiraj 17 vjeç.
Të plagosurit kanë deklaruar para hetuesve se nuk kanë konflikte me askënd dhe asnjë incident nuk kishte ndodhur në ditët para atentatit. As shoferi i tyre, as vetë të rinjtë nuk kanë precedentë penalë apo mosmarrëveshje të njohura.
Mësohet se tre të rinjtë, shokë mes tyre, kishin dalë për të festuar ditëlindjen e Dior Demirajt, 11 vjeç, dhe po ktheheshin me shoferin Arenc Stafa në shtëpi.
Ndjekja dhe të shtënat me armë nisën pranë rrethrrotullimit të Shkozës, përgjatë autostradës drejt TEG, ndërsa shoferi për të shmangur sulmin, ndryshoi rrugën drejt Lundrës.
