Atentati i një nate më parë ndaj një biznesmeni në Lezhë, ka nisur të zbardhet bashkë me mëngjesin e sotëm, duke nxjerrë në dritë fakte dhe detaje të reja interesante.
Autorët e krimit pasi e kanë qëlluar me breshëri plumbash objektivin e tyre, biznesmenin Aleksandër Deda, janë larguar me një mjet, i cili pas verifikimeve ka rezultuar tip “Audi”, i vjedhur në Lushnjë, ndërsa targat ishin “AA481GU”.
Ndërkohë, ky mjet është gjetur i djegur në fshatin Pllanë të Lezhës.
Gjatë kontrollit është sekuestruar një arme automatik “Mod. 56”, dhe në afërsi të mjetit një aparat celular i tipit “Nokia”. Provat materiale të sekuestruara janë çuar në laborator shkencor për t’u analizuar.
Ndërkohë, janë shoqëruar në polici disa persona, që dyshohet se mund të kenë dijeni për ngjarjen, ndërsa pritet dëshmia e të plagosurit, që mund të jetë kyçe për zbardhjen e ngjarjes dhe kapjen e autorëve.
Alkesandër Deda, gjatë udhëtimit me makinën e tij, është përballur me një breshëri plumbash që vinin nga një automjet tip “Audi”, nga ku edhe ka marrë plagë në gjoks.
Menjëherë është kthyer duke ju drejtuar Spitalit të Lezhës dhe gjatë udhëtimit, një automjet tjetër i është vënë në ndjekje, ndërkohë që vetë Deda ka bërë disa telefonata me të afërm të tij, duke iu treguar se çfarë i kishte ndodhur.
I plagosur ka mundur të përshkojë distancën afro 15 km deri afër spitalit, kohë ku edhe ka humbur sasi të madhe gjaku. Pas mjekimit që ka marrë nga bluzat e bardha të Lezhës, ai është dërguar menjëherë për në Spitalin e Traumës, në Tiranë, ku edhe ndodhet jashtë rrezikut për jetën.
/GazetaReforma.com/
