Presidenti amerikan Joe Biden ka ndërprerë fundjavën dhe fushatën elektorale, duke u rikthyer me urgjencë në Uashington pas atentatit ndaj ish-presidentit Donald Trump. Shtëpia e Bardhë njoftoi se “Presidenti Biden do të niset nga shtëpia e tij e plazhit në Rehoboth për në Uashington mbrëmjen e së shtunës”.
Në një deklaratë, Presidenti Biden dënoi sulmin ndaj Trump, duke theksuar se “të gjithë duhet ta dënojnë” atentatin e dyshuar ndaj ish-presidentit dhe shprehu shpresën për të folur së shpejti me rivalin e tij. Duke iu drejtuar vendit rreth dy orë pas ngjarjes, Biden tha se ndjehej i lehtësuar që, sipas njoftimeve, Trump “është mirë”. Ai shtoi se nuk kishte mundur të fliste me ish-presidentin Trump përpara se të bënte komentet publike dhe u zotua të informojë publikun nëse arrin të bisedojë me të dhe nëse merr detaje shtesë rreth hetimit.
“Ne nuk mund të lejojmë që të ndodhin gjëra të tilla. Ideja se mund të ndodhë një dhunë e këtij lloji në Amerikë është e pabesueshme”, deklaroi Biden. Ai shtoi se po priste informacion shtesë përpara se ta quante zyrtarisht sulmin një tentativë për vrasje ndaj ish-presidentit. “Unë kam mendimin tim, por nuk kam fakte,” u tha ai gazetarëve, duke u zotuar të japë informacione shtesë kur t’i marrë ato.
Presidenti Biden foli nga qyteti bregdetar Rehoboth i shtetit Delaware, ku po kalonte fundjavën. Ai mori “informacionin fillestar” nga këshilltarët e tij pas të shtënave dhe më pas mblodhi zyrtarët e sigurisë për një përditësim më të detajuar nga Kimberly Cheatle, drejtoresha e Shërbimit Sekret të Shteteve të Bashkuara, Sekretari i Sigurisë Kombëtare Alejandro Mayorkas dhe këshilltarja e Shtëpisë së Bardhë për Sigurinë, Liz Sherwood-Randall.
Pas incidentit, fushata e Biden njoftoi se po ndalte të gjitha mesazhet për përkrahësit e tij dhe se do të tërhiqte të gjitha reklamat televizive. Zëvendëspresidentja Kamala Harris tha në një deklaratë se edhe ajo ishte informuar, duke shtuar se ajo dhe bashkëshorti i saj “ndjehen të lehtësuar” që Trump nuk ishte lënduar rëndë. “Ne lutemi për të, familjen e tij dhe të gjithë ata që janë lënduar dhe prekur nga ky sulm i pakuptimtë,” tha ajo.
