Një atentat i rëndë me armë zjarri ka ndodhur këtë të diel në zonën e Balldrenit në Lezhë, ku dy persona kanë humbur jetën pasi automjeti me të cilin udhëtonin u qëllua në lëvizje.
Viktimat janë identifikuar si 39-vjeçari Kreshnik Mujeci dhe bashkëshortja e tij, 32-vjeçarja G. M., të cilët ndodheshin së bashku në një automjet tip Audi në momentin e sulmit.
Sipas njoftimit paraprak të policisë, ngjarja ka ndodhur rreth orës 14:50, në dalje të fshatit Balldren, në rrugën Balldren-Torrovicë. Në rrethana ende të paqarta, persona të armatosur kanë qëlluar me armë zjarri në drejtim të mjetit, duke shkaktuar vdekjen e menjëhershme të çiftit.
“Rreth orës 14:50 në dalje të fshatit Balldren, Lezhë, në rrugën Balldren-Torrovicë, në rrethana ende të paqarta gjatë lëvizjes, është qëlluar me armë zjarri në drejtim të automjetit Audi, me drejtues shtetasin K. M., 39 vjeç, që udhëtonte sëbashku me bashkëshorten e tij, shtetasen G. M., 32 vjeçe, të cilët kanë humbur jetën në vendngjarje”, njofton policia.
Menjëherë pas sinjalizimit, forcat e policisë kanë mbërritur në vendngjarje dhe kanë nisur kontrolle intensive në zonë për identifikimin dhe kapjen e autorëve. Një grup i posaçëm hetimor është ngritur dhe, nën drejtimin e Prokurorisë, po punon për mbledhjen e provave dhe zbardhjen e plotë të ngjarjes.
Drejtori i Policisë Vendore Lezhë, Arben Nasufi, konfirmoi se mjeti është qëlluar me breshëri plumbash ndërsa ishte në lëvizje.
“Në sallën operative të drejtorisë vendore të policisë Lezhë ka mbërritur një informacion për të shtëna me armë në Balldre. Menjëherë shërbimet e policisë kanë mbërritur në vendngjarje. Është konstatuar që mjeti është goditur me breshëri në lëvizje. Mjekët kanë konfirmuar për dy humbje jetësh, një burrë dhe një grua. Lajmi është shumë i rëndë. Po punojmë intensivisht për kapjen e autorëve”, u shpreh Nasufi.
Nga verifikimet rezulton se në tetor të vitit 2017, Kreshnik Mujeci ishte arrestuar si i dyshuar për vrasjen e shtetasit Genci Mhillaj në Shkodër. Ai u akuzua për veprën penale “Vrasja me paramendim”, e kryer në bashkëpunim.
Megjithatë, sipas një vendimi të vitit 2018 nga Gjykata e Shkodrës, Mujeci u shpall i pafajshëm, me argumentin se nuk provohej përfshirja e tij në ngjarje.
“Prova e vetme e pretenduar nga prokuroria si implikuese e të pandehurit Kreshnik Mujeci është se 2-3 km larg vendit të ngjarjes është gjendur e parkuar makina e tij është e mjaftueshme për të hedhur poshtë akuzën e ngritur ndaj këtij të fundit, si akuzë të paprovuar me prova bindëse, por vetëm me një indicie tejet periferike. Nga analiza e dëshmisë së shtetasit M.M rezulton se i pandehuri Kreshnik Mujeci ka shkuar dhe herë të tjera për të pirë kafe tek lokali i dëshmitarit pak metra më tutje dhe e ka parkuar makinën e tij dhe herë të tjera në atë vend.
Në këto kushte, vetëm fakti se këtë herë makina e të pandehurit është gjetur e parkuar në atë vend jo të pazakontë, nuk arrin dot as në nivelin e indicies për fajësinë e tij. Po ashtu nga vetë i pandehuri Kreshnik Mujeci u shpjegua versioni i ngjarjes. I pandehuri deklaroi se ai me të marrë vesh për faktin se sipas lajmeve kushëriri i tij Jozefi kishte kryer një vrasje e çmoi të arsyeshme për shkak të ndonjë hakmarrje të mos lëvizte nga vendi ku po qëndronte po ashtu ka bërë dhe me makinën”, thuhet në arsyetimin e gjykatës.
Hetimet për atentatin vijojnë.
