Një muaj më parë kamarieri 17-vjeçar Antonio Deliaj humbi jetën nga ashensori në vendin e tij të punës, klubin “Orange” në Sarandë.
Policia njofton ditën e sotme se ka vënë në pranga pronarin e lokalit, Spiro Iljadhi.
Bëhet me dije se Iljadhi është arrestuar nga policia kufitare në Doganën e Qafë Botës, pasi ndaj tij është dhënë masa arrest me burg për “shkeljen e rregullave të mbrojtjes në punë”.
Njoftimi i plotë i Policisë së Shtetit:
Kapet dhe vihet në pranga pronari i lokalit ku një muaj më parë, për shkak të këputjes së kavos së ashensorit, humbi jetën një 17-vjeçar i punësuar në këtë lokal.
Shërbimet e Stacionit të Policisë Kufitare Qafë Botë, si rezultat i kontrolleve të shtuara për goditjen e krimeve kufitare dhe kapjen e shtetasve në kërkim, kanë kapur dhe ndaluar shtetasin në kërkim S. I., 37 vjeç, banues në Sarandë.
Gjykata e Shkallës së Parë e Juridiksionit të Përgjithshëm Sarandë ka caktuar ndaj këtij shtetasi, masën e sigurisë “Arrest në burg”, për veprën penale “Shkelja e rregullave të mbrojtjes në punë”, pasi më datë 26.08.2023, në lokalin në pronësi të tij, për shkak të këputjes së kavos së ashensorit, humbi jetën një 17-vjeçar i punësuar në këtë lokal.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
