Prokuroria e Tiranës ka thirrur sot në pyetje tre specialistët e Institutit të Ndërtimit, që përpiluan akt-ekspertizën dhe dolën në konkluzionin se godina e Teatrit Kombëtar duhet shembur.
Tre specialistët u kallëzuan në Prokurorinë e Tiranës nga Aleanca për Mbrojtjen e Teatrit.
Në ambientet e Prokurorisë për të dhënë dëshminë e tyre, kanë shkuar Elbarina Kola dhe Olsi Nunaj, të dy specialistë pranë Institutit të Ndërtimit dhe Artur Hasantare përgjegjës.
Të tre përpiluan akt ekspertizën duke dalë në përfundimin se godina e Teatrit Kombëtar duhej që të shembej.
Kujtojmë se ndërtesa e Teatrit Kombëtar u shemb me vendim të Bashkisë së Tiranës më 17 maj veprim i cilësuar si ilegal nga ATK është cilësuar i paligjshëm nga aktivistë të Aleancës për Teatrin, ndërsa Prokuroria e Posaçme Anti-Korrupsion ka nisur hetimet.
Akuza që rëndon mbi ta është “për shpërdorim detyre” bazuar në informacionet e mbledhura në kallëzimin e bërë në polici.
Në kallëzimin penal të depozituar nga ATK në prokurorinë e Tiranës thuhet:
Nga ana subjektive vepra është kryer me dashje, pasi të tre këta shtetas kanë qenë të vetëdijshëm që ekspertimi i tyre është bërë fiktiv, i pabazuar në verifikime konkrete të gjendjes së Teatrit Kombëtar dhe me vetëdije ata shprehen në ekspertim se “Kushtet aktuale të godinës së Teatrit Kombëtar nga ana statike nuk janë të përshtatshme për kryerjen e aktiviteteve, ato janë jashtë normave të projektimit dhe shfrytëzimit të një objekti të kësaj kategorie”duke i nisur këshilltarëve të Bashkisë Tiranë një ekspertizë të pavërtetë dhe të pabazuar në verifikimet në terren.
Ekspertët kanë marrë atribute që nuk i takojnë me ligj duke cuar Këshillin Bashkiak në një vendimarrje të gabuar.
