Andon Salati, 32-vjeçari nga Vlora, është një nga të arrestuarit në operacionin “Sky ECC” në Greqi, i konsideruar si një nga krerët e grupeve kriminale në bashkëpunim me Denis Grabockën.
Salati, me pseudonimet “Sal”, “Salah” dhe “Toni”, përdorte platformat e enkriptuara “Sky ECC” dhe “Encrochat” për të koordinuar trafikun e drogës nga Spanja dhe Shqipëria drejt Greqisë.
Në shkurt 2016, ai u ndalua në pikën kufitare të Kakavijës me 148 mijë euro cash, por u ndoq në gjendje të lirë.
Nga 2018 deri në 2020, Salati ishte i burgosur në Koridhalo, ku vazhdoi të kontrollonte trafikun e drogës përmes komunikimeve të koduara.
Në mesazhet e tij, përshkruan komoditetet brenda burgut, si celularët, televizorët dhe internetin, si dhe marrëdhëniet e mira me gardianët, që dyshohet se e ndihmonin në veprimtarinë e tij.
Salati dhe Grabocka ishin pronarë të fshehtë të kompanisë “CARENT” në Athinë, e cila dispononte automjete dhe motoçikleta me qira që përdorej për mbulim ligjor në aktivitetet kriminale.
Ai ishte gjithashtu i lidhur me një tjetër kompani në Mykonos dhe një steakhouse në Athinë, duke përdorur bizneset si fasadë për organizatën e tij kriminale.
