Fikrim Damka, Ministri i Zhvillimit Rajonal në Kosovë dhe kryetar i Partisë Demokratike Turke të Kosovës, është arrestuar së bashku me djalin e tij, Fuat Damka, dhe është caktuar një masë sigurie për 48 orë.
Ata dyshohen për kanosje dhe sulm ndaj dy individëve të tjerë në Prizren, afër parkut “Korrilla,” më 9 shkurt rreth orës 18:00.
Sipas prokurorisë, ngjarja nuk lidhet drejtpërdrejt me zgjedhjet, megjithatë disa media kanë spekuluar se mund të ketë një lidhje politike, pasi viktimat janë anëtarë të një partie tjetër turke.
Rasti është konfirmuar nga Policia e Prizrenit.
“Dje me datë 09.02.2025 rreth orës 18:00 në Prizren është raportuar një rast ‘Kanosje dhe Sulm’ , Policia ka intervistuar të dyshuarit F.D. dhe F.D dhe viktimat si dhe janë mbledhur edhe prova dhe dëshmi tjera”, ka thënë zëdhënësi Shaqir Bytyqi.
Pas intervistimit, me vendim të prokurorit dy të dyshuarit janë ndaluar për 48 orë.
Kryeprokurori i Prizrenit, Petrit Kryeziu tha se Damka ka sulmuar një kandidate nga Partia Turke e Lëvizjes Novatore, si dhe një tjetër person nga kjo parti.
“Sulm dhe kanosje ndaj saj dhe ndaj një personi të dytë, nga e njëjta parti me zonjën. Janë dy persona të ndaluar”, ka thënë ai.
