Në ditën e fundit të fushatës zgjedhore, është arrestuar kandidati i koalicionit ‘Bashkë Fitojmë’ për bashkinë e Himarës, Fredi Beleri. Sipas informacioneve të deritanishme Beleri akuzohet për blerje votash.
Beleri është arrestuar pak pas mesnate para lokalit të tij bashkë me 3 persona të tjerë, avokati, dhe përfaqësues të shtabit elektoral.
Siç shihet dhe nga video ku tregohej momenti i arrestimit, forca të shumta policie morën pjesë në prangosjen e tij, që u bë me urdhër të Prokurorisë së Vlorës.
Sipas informacioneve nga burime policore, Beleri dhe të tjerët në dëshmitë e tyre kanë mohuar që të jenë përfshirë në shkelje të tilla, si blerja e votave.
Ndërkohë, mësohet se një prej të arrestuarve është ndjerë keq gjatë arrestimit, pasi vuante nga problemet e zemrës. Ndaj është dashur që të ndërhyjë një ambulancë për dërgimin e tij në spital. Duke marrë shkas nga tensionet e së shkuarës në këtë bashki, Beleri dhe personat e tjerë të arrestuar janë shoqëruar në drejtorinë e Policisë së Vlorës. Raportohet se në komisariatin e Himarës kanë qëndruar përgjatë gjithë natës mbështetës të Belerit.
Vlen të thekojmë se arrestimi i kandidatit të opozitës në Himarë vjen në mbyllje të fushatës elektorale për zgjedhjet lokale të 14 majit.
