Një skandal i rëndë tronditi më herët tregun europian të ushqimeve për foshnje, pasi në disa produkte të markës HiPP u konstatua prania e helmimit me substanca për minj. Autoritetet konfirmojnë se një person është arrestuar në Austri, ndërsa dyshohet se kontaminimi është kryer qëllimisht në kuadër të një tentative shantazhi ndaj kompanisë.
Sipas prokurorisë në Eisenstadt, një burrë 39 vjeç akuzohet se ka ndërhyrë në produkte të shpërndara në disa vende europiane, me synimin për të zhvatur para nga kompania gjermane HiPP. Identiteti i tij dhe detaje të tjera mbi motivet nuk janë bërë publike, ndërsa hetimet vijojnë.
Autoritetet kanë konfirmuar se pesë kavanoza të kontaminuara janë zbuluar në Austri, Republikën Çeke dhe Sllovaki. Rasti u zbulua fillimisht në Austri, pasi një klient raportoi një kavanoz të dyshimtë. Analizat laboratorike konfirmuan praninë e bromadiolonit, një substancë shumë e rrezikshme që përdoret si helm për brejtësit.
Në një nga produktet, konkretisht një kavanoz 190 gramësh me ushqim për foshnje me karrota dhe patate, janë gjetur rreth 15 mikrogramë helm për minj. Më pas, në qytetin Brno në Çeki, policia identifikoi edhe dy kavanoza të tjera të kontaminuara në një dyqan, në vendndodhjen e përshkruar nga autori i dyshuar në një email.
Produktet e manipuluara janë identifikuar përmes një ngjitëseje të bardhë me një rreth të kuq në fund. Autoritetet kanë urdhëruar tërheqjen e menjëhershme nga tregu, ndërsa hetimi penal është shtrirë në Austri, Çeki dhe Sllovaki.
Kompania HiPP reagoi duke theksuar se nuk bëhet fjalë për një problem në procesin e prodhimit, por për një akt kriminal të qëllimshëm. “Proceset tona të prodhimit dhe kontrollit të cilësisë janë të paprekura”, deklaroi kompania.
Sipas njoftimeve zyrtare, kompania kishte marrë një email kërcënues javën e kaluar nga personi i dyshuar, i cili kërkonte para në këmbim të ndalimit të kontaminimit. Menjëherë pas këtij mesazhi, HiPP njoftoi policinë dhe aktivizoi mekanizmat e brendshëm të menaxhimit të krizës.
Autoritetet sqarojnë se bromadioloni ndikon në mpiksjen e gjakut dhe simptomat mund të shfaqen pas disa ditësh. Megjithatë, deri tani nuk është raportuar asnjë rast helmimi nga konsumimi i produkteve dhe theksohet se trajtimi është i mundur.
Hetuesit dyshojnë për një skemë të mirëorganizuar, pasi autori ka treguar me saktësi vendndodhjen e produkteve të manipuluara. Ndërkohë, policia austriake paralajmëron se mund të ekzistojë edhe të paktën një kavanoz tjetër ende i paidentifikuar.
Pas tërheqjes masive nga tregu, rreziku për konsumatorët konsiderohet shumë i ulët. Autoritetet u bëjnë thirrje prindërve të kontrollojnë çdo kavanoz përpara përdorimit, duke verifikuar kapakun, vulën dhe çdo shenjë të pazakontë. Ky incident vjen pas disa alarmesh të tjera për ushqimet për foshnje në Europë, por në këtë rast ngjarja po trajtohet si një akt i pastër kriminal.
